Klăng roh jâ Penny Wong lăm pôu pêi cheăng Việt Nam roh má péa. Kố cho troăng pêi châ rak đi đo pơla péa Khu xiâm tơpui kâ. A hneăng hôp, péa pâ tơkŭm tơpui tơno ‘na tơdroăng pêi pro khu tơrŭm cheăng ton xŏn Việt Nam – Australia. Hvái ngăn tung pơla kố nah, tơrŭm cheăng kâ – tê mơdró péa tơnêi têa mơnhông mơdêk ó rơdêi, pơtối mê pêi lo liăn tê mơdró hơnăm 2022 hiăng châ vâ chê 16 rơtal dollars, djâ Việt Nam chiâng khu tê mơdró kân roh má 10 dêi kong têa Australia ƀă Australia chiâng khu tê mơdró kân má 7 dêi Việt Nam.

Mâu kơvâ tơrŭm cheăng nếo môi tiah hbrâ ví kong prâi hơ’lêh, rơnêu bro, krâ hnhâng troăng on tơhrik dế châ tơmâng mơdêk pêi pro khât; tung mê ai kơxô̆ liăn tŏng kum 105 rơtuh dollars Australia (AUD) Australia ăm Việt Nam vâ mơjiâng hngêi trăng - troăng klông hbrâ ví kong prâi hơ’lêh ƀă mơjiâng on tơhrik krúa lĕm.

Ngế xiâm tơpui kâ kong têa Australia mơnhên tối, Australia nhuô̆m tơrŭm cheăng ƀă môi tuăn hnoăng tíu xiâm dêi ASEAN; môi tuăn pơtối mơdêk tơrŭm xua tơdroăng mơnhông mơdêk krá tơniăn dêi kơpong Mekong; tơkêa tŏng kum Việt Nam hbrâ ví kong prâi hơ’lêh ƀă mơjiâng on tơhrik krúa lĕm.