Hơnăm 2018, Ƀinh đoân 15 ƀă Khu hnê mơhno tơdroăng cheăng kal kí pơlê cheăm ƀă mơnhông thôn pơlê tung tâi tâng (Khu xiâm pơkuâ ngăn lêng kong têa Lếo) tơkŭm po leh kĭ Tung hlá mơ-éa tơrŭm pro nhŏng o.

Péa tíu pêi cheăng hiăng tơrŭm hên tơdroăng cheăng lăm hyô ngăn, hriâm tâp, tơpui tơno ‘na tơdroăng cheăng pêi túa pêi chiâk deăng - pêt ƀă rak ngăn kong, hnê hriâm - hnê mơjiâng tuăn ngôa rơkê, pơkeăng khăm pơlât ƀă cheăng lêng kring tơniăn; tơrŭm séa ngăn mâu tơdroăng a kong pơlê  Xay Sổm Bun ƀă kong pơlê Xiêng Khoảng pro tíu xiâm veăng kum kong têa pú tơbleăng mâu tơdroăng tơkêa bro; Binh đoân 15 veăng kum tơdroăng tŏng kum mâu ngế xơpá, mâu ki hliăng tiâ, xĕn tíu ê ăm hrĭng rơpŏng kuăn pơlê a kơpong ai tơdroăng tơkêa bro lăm ối a tíu tơniăn; tơkŭm po khăm pơlât xoăng pơkeăng tê kơtê ăm rơpâu ngế.

Mơnê hnoăng veăng ‘no, Khu xiâm pơkuâ ngăn lêng kong têa Lếo hiăng diâp hlá cơ châ Ƀlêi ƀă Mê dái Khên tơnôu má II, má III ăm mâu khu pú hên, mâu ngế dêi Ƀinh đoân 15.