Tung hơnăm 2024, Ƀinh đoân 15 hiăng châ pêi pro hên hnoăng cheăng ki kal xiâm. Ƀinh đoân hiăng pơkâ mơjiâng pro mâu hnoăng cheăng ki hbrâ rơnáu tiô chal nếo, pơtối rak vế tơniăn hnoăng cheăng hbrâ vâ tơplâ ƀă rak vế châ dâi khât mâu troăng hơlâ ki kring vế, gak ngăn tơniăn a drô troăng tíu tơkăng kong a mâu kong pơlê, pơlê kong kân tiô kơhnoăng cheăng pêi ki kân hơngăm tiô chal nếo. Pakĭng mê, mâu khu râ, kơvâ cheăng dêi Ƀinh đoân hiăng pơkrâ 750 toăng camera kring vế-gak ngăn a mâu kơpong ki kal, veăng gum kal kân khât ăm hnoăng pring vế kơpong tíu tơkăng kong pơla Việt Nam ƀă kong têa Kul.

Veăng a roh hôp kố, Đăi tă Phan Xuân Hoà - Kăn pơkuâ hnê ngăn cheăng Đảng uỷ hneăng hdrối, Phŏ Kăn pơkuâ Kŏng ti 715 dêi Ƀinh đoân 15 hiăng tơpui tối phiu ro drêng hlo Ƀinh đoân hiăng pêi pro hên  tơdroăng cheăng. Ƀinh đoân ôh ta xê bu to mơjiâng pro mâu tơmeăm khoăng ki vâ xúa mê ối ‘no liăn ngân, kế tơmeăm vâ mơjiâng mâu tơmeăm khoăng ki kal a mâu kong pơlê, pơlê kong kân ki Ƀinh đoân pro đông, gum mơdêk tơdroăng rêh kâ ối, pêi cheăng kuăn pơlê a mâu kong pơlê, pơlê kong kân. La ngiâ kố ah, Ƀinh đoân kô pơtối mơdêk hnoăng cheăng ki khên tơnôu, mơjiâng khu pơkuâ cheăng rế hía rế mơnhông mơdêk.