Tíu xiâm séa ngăn, pơkuâ tíu xiâm tê mơdró kơdrâm rơkê kong pơlê Dak Lak (tối cho Dak Lak IOC) mot pêi cheăng sap ing khế 9/2021. Klêi kơ’nâi 2 hơnăm pêi cheăng, phân mêm Dak Lak mơ’no tơdrêng tung um tiô troăng hyôh măng ai vâ chê 30.000 roh taih ƀă tơ’mot tung kơmăi. Kŏng thông tin http://tuongtaccongdan.daklak.gov.vn/ tơbleăng tơdrăng tơdroăng hiăng klêi tơleăng hiăng châ tơdah tơdroăng tơmâng dêi kơdrâm kuăn pơlê.

Nâ Trần Lệ, ối a bêng Thắng Lợi, pơlê kong kơdrâm Ƀuôn Ma Thuột tối:

“Phân mêm kô ‘mot tơ’lêi hlâu, drêng mot tung ngiâ méa cho tơ’lêi ngăn. ‘Na ki ăm mơngế xúa ai hên tơmeăm ki mơngế vâ xúa hôm. Pơtih môi tiah camera mơ’no tơdrêng tiô troăng hyôh măng. Nôkố ki hên rêm ngế trâm pá drêng lăm pro mâu mơ-éa a kơ koan tơnêi têa, kơnôm phân mêm kố mê pin kô chiâng tơdrêng djâ hô sơ to a mâu tíu cheăng tơdrêng tung um tiô troăng măng dêi tơnêi têa vâi kô tơdah hô sơ vâ pro ƀă pin ‘nâi tơdroăng ki tơleăng hô sơ gá môi tiah lâi. Kuăn pơlê taih xo xúa phân mêm kố ‘mot a kơmăi mê cho pơxúa vâ séa ngăn mâu tơdroăng dêi mâu kơ koan’’.

Pôa Võ Nguyễn Hoàng Nam, Kăn phŏ pơkuâ Tíu xiâm IOC kong pơlê Dak Lak tối ăm ‘nâi, troh nôkố, tíu cheăng hiăng pêi kêi đeăng ƀă djâ xúa lối 450 mâ camera rơkê a hên tíu tung pơlê kong kơdrâm Ƀuôn Ma Thuột ƀă mâu tơring, pơlê kong krâm tung kong pơlê. Tơdroăng châ xo ing mâu camera châ tơdjêp troh a tíu xiâm séa ngăn pơkuâ tíu xiâm tê mơdró kơdrâm tê mơdró rơkê dêi kong pơlê.

Pakĭng mê, kŏng ngê̆ tuăn ngôa rơkê xua kuăn mơngế pro châ ‘mot tung phân mêm tông đai 1022 ƀă 10 tơdroăng pêi  cheăng ki kal. Mâu tơdroăng cheăng kố apoăng hiăng mơnhông châ hnoăng cho xiâm kối ki xiâm ăm mơjiâng chiâng môi tíu xiâm tê mơdró kơdrâm rơkê. Pôa Nguyễn Võ Hoàng Nam tối ăm ‘nâi:

“Tơdroăng cheăng tíu xiâm tê mơdró kơdrâm rơkê cho ƀâng trâm pơla khu râ kăn pơkuâ ƀă kuăn pơlê, vâ pro ti lâi kuăn pơlê ai ƀâng tơdjêp ki xiâm ƀă khu râ kăn pơkuâ tung mê tơkŭm tung tơdroăng tối mâu tơdroăng pâ thế dêi kuăn pơlê, mâu tơdroăng ki kuăn pơlê rơhêng vâ ‘nâi plĕng ‘na tơniăn, rak tơniăn troăng klông, kong prâi ‘na tâi tâng mâu tơdroăng ki ai rơtâ tá mâu tơdroăng ki tá hâi tro tiô pơkâ mê kô châ kuăn pơlê tiâ tối ‘na tíu xiâm IOC’’.

Phân mêm kố rế hía rế tơdah hên rơkong tơpui tối dêi kuăn pơlê a rêm tíu pơtroh ăm. Ing mê, kăn pơkuâ mâu tíu cheăng hiăng tơmâng rơkong tơpui dêi kuăn pơlê, khu tê mơdró, séa ngăn châ tơdroăng cheăng ƀă tơdroăng tơleăng, mơhnhôk, pơchân tối mâu khu cheăng. Pôa Trần Xuân Hiệp, Kăn phŏ Ƀơrô Vi ƀan tơring Čư Mgar, tối ăm ‘nâi:

“ ‘Na tơdroăng tơno dêi pó pơla tơring ƀă Khu pơkuâ tíu pơtroh tơdroăng kal tiô troăng um tơvi, rơ’jíu ƀă internet hiăng châ tơƀrê. Mâu tơdroăng tiâ tối kuăn pơlê pơtroh hiăng châ IOC mơdrêo a tơring ƀă tối tơbleăng tơring tơleăng teăm tơdrêng’’.

Tiô pôa Trương Hoài Anh, Kăn pơkuâ Khu pơkuâ tơdroăng kal tiô troăng um tơvi, rơ’jíu ƀă Internet kong pơlê Dak Lak, Tíu xiâm, séa ngăn pơkuâ tíu xiâm tê mơdró kơdrâm rơkê kong pơlê Dak Lak hiăng kum ăm tơdroăng pơkuâ ƀă tơleăng tơdroăng dêi mâu kơ koan cheăng tơkŭm po tơdrăng lĕm, rĕng, châ tơƀrê. Tơdrêng amê cho kông tơdjêp tơno 2 pâ drêng kuăn pơlê kô chiâng pơtroh rơkong veăng tơpui tối, tơbleăng lơ tiâ tối ăm mâu kơ koan Tơnêi têa ‘na mâu tơdroăng ki ôh tá tơniăn, tơdroăng tơdjâk troh tơniăn tíu xiâm tê mơdró kơdrâm, troăng klông, tơniăn, tơmeăm khoăng ‘na kih thuât dêi kong pơlê.

Vâ pêi kêi đeăng phân mêm tiô xiâm kối kŏng ngê̆ a tíu xiâm, pôa Trương Hoài Anh tối ăm ‘nâi:

“Mơhnhôk mâu tơring ai ivá kô chôa ‘lâng mơ’no liăn rôe kơmăi kơmok vâ ai tíu xiâm IOC krê dêi tơná vâ rơtế ƀă IOC dêi kong pơlê vâ pro ti lâi tơxâng mâu pơkâ pơkuâ hnê mơhno xuân môi tiah tơdroăng ki veăng pơkuâ tơnêi têa dêi kuăn pơlê ƀă khu tê mơdró tung kong pơlê’’.