VOV4.Xơ Đăng - Khu xiâm ngăn vâi droh rơtăm Việt Nam ƀă Khu xiâm ngăn ‘na ƀok thái pơkeăng Việt Nam nếo tơkŭm po Leh mơ’no khu ƀok thái pơkeăng hơnăm ối nếo pêi pro tiô rơkong hnê tối dêi Pôa, mơhnŏng pleăng hnoăng cheăng xua vâ rak vế ivá pơlê pơla hơnăm 2022, dó inâi “Khăm pơlât, rak găn ivá klêi kơ’nâi COVID-19”. Pơla hdrối kố nah, a mâu kong pơlê tung lâp tơnêi têa xuân hiăng pơkâ pêi pro ‘na tơdroăng mơhnŏng pleăng hnoăng cheăng xua vâ khăm pơlât, rak ngăn ivá pơlê pơla.

Troăng prôk dêi khu ƀok thái pơkeăng hơnăm ối nếo pêi pro tiô rơkong Pôa Hồ mơhnŏng pleăng dêi ivá ăm pơlê pơla po sap ing hâi lơ 14/5 troh tâi hơnăm kố, tơkŭm rak ngăn ivá ăm kuăn pơlê klêi kơ’nâi tro COVID-19, ƀă tơdroăng ki xiâm cho 20 rơpâu ngế ƀok thái pơkeăng hơnăm ối nếo veăng tung tơdroăng khăm, tiâ mơnhên ivá klêi kơ’nâi tro pơreăng COVID-19 ăm lối 1 rơtuh ngế kuăn pơlê; lối 3 rơtuh ngế châ khăm ngăn tâi tâng ƀă tiâ mơnhên tơdrêng ing hyôh Internet; 100 rơpâu ngế kuăn pơlê châ tiâ mơnhên, khăm tơdrêng.

Tơdroăng kố xuân mơhnhôk hô̆i viên, droh rơtăm veăng pleăng 50 rơpâu tơdrong mơheăm, mơhnôk 1 rơtuh ngế hô̆i viên hriâm pât ivá hriâm tiô troăng djâ troăng ahdrối dêi Pôa; hriâm tâp, hbrâ rơnáu mau tơdroăng ki hlê plĕng ăm 100 rơpâu ngế ki pleăng dêi hnoăng cheăng ‘na tiâ mơnhên trếo kơhiâm ƀă tơdroăng ki hlê plĕng tung hbrâ mơdât pơreăng.

Tâi tâng kuăn pơlê hiăng tâ pơreăng COVID-19 châ xúa mâu hlá mơ-éa rak ngăn ivá klêi kơ’nâi tro pơreăng COVID-19. Kăn hnê ngăn khu ƀok thái pơkeăng hơnăm ối nếo Việt Nam Hà Anh Đức ăm ‘nâi:

“Tơdroăng ƀok thái pơkeăng hơnăm ối nếo pêi pro tiô rơkong Pôa – Xua ivá pơlê pơla. Hơnăm kố, ngin rơhêng vâ tơkŭm tơ’nôm, mê cho troăng tơmiât troh mâu ngế ki tro tâ pơreăng COVID-19, xuân cho troăng tơmiât troh tơdroăng cheăng tơmiât troh Hneăng hôp Đoân lâp tơnêi têa. Rôh apoăng xúa mâu kơmăi kơmok nếo pakĭng tơdroăng ki khăm pơlât tơdrêng, pin ai troăng hotline kô kum pro ton hâi khế tung tơdroăng ki châ achê kuăn pơlê kal tŏng kum má môi, pakĭng mê ing rôh tiâ mơnhên tơdrêng ing phôn, teleheath, vâ tiâ mơnhên tơdrêng ăm kuăn pơlê”.

Pôa Trần Tuấn Anh, ngế xiâm ngăn cheăng kâ Tơnêi têa tơpui a rôh leh lo pêi cheăng

Veăng ai mâ a leh tơbleăng râ tơnêi têa a kong pơlê Thừa Thiên Huế, pôa Trần Tuấn Anh, ngế xiâm ngăn tơdroăng cheăng kâ Tơnêi têa mơnhên tối khât ‘Tơdroăng Ƀok thái pơkeăng hơnăm ối nếo pêi pro tiô rơkong Pôa, mơhnŏng pleăng dêi ivá ăm pơlê pơla” hơnăm kố, tơdrêng amê hlối tối nhên: Tung hneăng klêi kơ’nâi tâ pơreăng COVID-19, kô kal hên ivá mơ-eăm vâ tơdroăng rêh ối dêi kuăn pơlê a tơdroăng ki tiah hmâ nếo”, vâ ivá hiâm mơno dêi kuăn pơlê, tung mê ai khu pêi cheăng châ rak vế, pro chiâng tơdroăng, ivá ăm mâu tơdroăng cheăng kâ tê mơdró ƀă tơdroăng cheăng pơlê pơla dêi tơnêi têa châ tơniăn ƀă pơtối mơnhông tơtêk.

Pôa Trần Tuấn Anh tối nhê:

“Á loi tơngah hiâm mơno rơkê plĕng, mơhnŏng pleăng, khŏm mơ-eăm tơkâ luâ mâu tơdroăng xơpá, Tơdroăng ƀok thái pơkeăng hơnăm ối nếo pêi pro tiô rơkong Pôa hơnăm 2022 kô pêi châ hên mâu tơdroăng ki pơkâ mơ’no, ƀă lối rơtuh ngế kuăn pơlê châ khăm, hnê mơnhên ivá, ‘mâi mơnhông ƀă hơ’lêh ivá klêi kơ’nâi tâ pơreăng COVID-19. Á phiu ro ƀă mâu tơdroăng pơkâ, troăng tơmiât ƀă mâu tơdroăng pơkâ tơmiât tung rêm ngế kuăn pơlê.

Tơdroăng mê mơhno tối hnoăng cheăng kuăn pơlê cho ối tung khu pơkuâ tơdroăng kal kí tung mâu troăng hơlâ ƀă tung mâu tơdroăng môi tiah dêi Đoân Droh rơtăm”.

A leh lo lăm pêi cheăng, lối 1.200 ngế ki tro pơreăng COVID-19 hiăng châ khăm ngăn, siêu âm, séa ngăn mơheăm, hnê mơhno chêh inâi rak ngăn ivá pơtối hlối ing tơdroăng ki xúa tuăn ngoâ rơkê ki pro dêi Vinbrain ƀă tổng đài rak ngăn ivá. Drêng kố, Khu pơkuâ ngăn Tíu xiâm Đoân xuân diâp 40 hnoăng tơmeăm ăm mâu rơpŏng ki ai troăng hơlâ tŏng kum ƀă mâu vâi hdrêng ki ai tơdroăng rêh ối xơpá; pôu kơ-êng Ƀok, thái pơkeăng Trung ương Huế ƀă mâu ngế ki châi tamo veăng khăm klêi kơ’nâi tro pơreăng COVID-19.

Tung pơla hdrối nah, a mâu kong pơlê, pơlê kong kân tung lâp tơnêi têa xuân hiăng tơkŭm lo lăm pêi cheăng “Tơdroăng Ƀok thái pơkeăng hơnăm ối nếo pêi pro tiô rơkong Pôa”. Mâu kong pơlê hiăng tơkŭm khăm ngăn ivá klêi kơ’nâi tâ pơreăng COVID-19, hbru ăm pơkeăng tê kơtê ƀă hbru tơmeăm ăm lối 50 rơpâu ngế kuăn pơlê ƀă vâi hdrêng ki ai tơdroăng rêh ối xơpá tung lâp tơnêi têa, tơdrêng amê hlối tiâ mơnhên, hnê mơhno chêh inâi khăm, rak ngăn ivá pơtối ăm lối 100 rơpâu ngế kuăn pơlê chêh inâi.

Tiê̆n sih - Ƀok thái pơkeăng Nguyễn Tiến Quang, Kăn hnê ngăn Hô̆i đong rak ngăn Hngêi pơkeăng K (Hà Nội) tối nhên:

“A hngêi pơkeăng K xuân ai khu ƀok thái pơkeăng hơnăm ối nếo ối tung Khu ƀok thái pơkeăng hơnăm ối nếo Việt Nam. Tung tơdroăng mê, pakĭng tơdroăng khăm rêm hâi ‘na ŭm ‘mêi tung châ, mâu ƀok thái pơkeăng ối veăng tung tơdroăng cheăng tơdjuôm, khăm ivá ăm pơlê pơla. Hô̆i ối tơbleăng, ngin kô xing xoăng hâi chôu, mâu ngế cheăng veăng tung tơdroăng cheăng kố”.

Khu ƀok thái pơkeăng hơnăm ối nếo Việt Nam veăng tung tơdroăng cheăng

Hdrối mê, hneăng ki ai pơreăng kân COVID-19 tâ tú rơ-iêo, Tơdroăng ƀok thái pơkeăng hơnăm ối nếo pêi pro tiô rơkong pôa, pleăng hnoăng xua pơlê pơla xuân ối châ tơkŭm po ƀă tơdroăng ki rơkê, tơtro ƀă tơdroăng ki hbrâ mơdât pơreăng a mâu kong pơlê, tơtro ƀă tơdroăng rak ngăn ivá sap ing hngế xúa telehealth ƀă tơdroăng ki hbrâ rơnáu lăm khăm a pơlê pơla dêi mâu Hô̆i, kâu lăk ƀô̆ ƀok thái pơkeăng hơnăm ối nếo tung lâp tơnêi têa.

Pakĭng mê, Hô̆i ối mơhnhôk lối 130 rơtal kế tơmeăm kum ăm khu cheăng ‘na khăm pơlât hbrâ mơdât pơreăng, ki hên cho mâu túa container ki kum ô-xy, container séa ngăn mơheăm ukố umê ƀă khăm châi tamo. Troăng Ƀok thái pơkeăng rơtế prôk hiăng mơhnhôk va chê 20 rơpâu ngế ki pleăng dêi hnoăng cheăng tung lâp tơnêi têa, khăm, séa ngăn, tiâ mơnhên ƀă hơ’lêh tíu ăm vâ chê 4 rơtuh ngế kuăn pơlê. Ƀô̆ cẩm nang rak ngăn ivá drêng tâ COVID-19 dêi Hô̆i hiăng châ tơbleăng ƀă lối 10 rơtuh xôh taih xo.

VOV1

Katarina Nga tơplôu ƀă tơbleăng