VOV4.Xơ Đăng - Kơxê lơ 4/7, pôa Phạm Minh Chính, Ngế pro xiâm hnê ngăn tơnêi têa rơtế mâu khu râ kăn pêi cheăng tung Chin phuh, mâu kong pơlê hiăng tơpui ‘na po rơdâ pêi pro mâu tơdroăng tơkêa bro troăng kân ki kal tơnêi têa. Xông tơpui a roh hôp, pôa Phạm Minh Chính tối, tơdroăng pêi pro mâu tơdroăng tơkêa bro troăng kân ki kal tơnêi têa cho pêi pro hnoăng cheăng châ tơƀrê ton xŏn ki Pơkâ Hneăng hôp XIII dêi Đảng hiăng mơhno nhên. Ngế pro xiâm hnê ngăn tơnêi têa pơkâ mâu khu xiâm, kơvâ cheăng, kong pơlê pơtối séa ngăn, pêi tơtro tơdroăng pêi hbrâ mơ’no liăn cheăng. Thăm pêi pro tơdroăng tăng tơnêi, tung mê, hnoăng ki kal dêi khu râ kăn pơkuâ kong pơlê.

Xing xoăng liăn tŭm vâ pêi pro mâu tơdroăng tơkêa bro ƀă mơ’no liăn châ tơƀrê mâu kơxô̆ liăn. Khu xiâm pơkuâ tơmeăm khoăng, loăng pơlái kong kế ƀă kong prâi pơtối châ séa ngăn, tâng ối tơvâ mê tah lôi tơdrêng vâ ai mâu kơpong ai tơmeăm tung kơdâm tơnêi, tŭm tơmeăm ăm mâu tơdroăng tơkêa bro. Ngế pro xiâm hnê ngăn tơnêi têa pơkâ rĕng rah tŭm tâi tâng Khu hnê mơhno Vi ƀan cho Tôh trương vâ thăm pêi pro ƀă tah lôi mâu tơdroăng ki ối tơvâ tung tơdroăng pêi pro tơdroăng tơkêa bro ƀă hía hé.

A Sa Ly tơplôu ƀă tơbleăng