Rơtế ƀă mâu tơdroăng tơmiât troh tơdah kuăn pơlê ƀă tơmối ôm hyô a roh mơ’nui hơnăm, pơlê kong kơdrâm Đà Lạt hbrâ tơkŭm po hên tơdroăng ki kal păng ‘nâng vâ koh phiu ro 130 hơnăm mơjiâng ƀă mơnhông, môi tiah: Lêh hô̆i xah rêi nhak lâp plâi tơnêi hơnăm 2023; kơmăng trâm mâ tơpui tơno khôi túa lĕm tro ngê̆ thuât Việt Nam – Hàn Quốc; mơđah tơbleăng mâu tơdroăng châ tơƀrê cheăng kâ – rêh ối pơlê pơla dêi pơlê kong kơdrâm Đà Lạt; leh tơbâ 130 hơnăm Đà Lạt mơjiâng ƀă mơnhông, tơdah inâi pơlê kong kơdrâm tơmiât pêi rơkê ‘na kơvâ xah rêi nhak xua UNESCO mơnhên.

Pôa Đặng Quang Tú, Kăn hnê ngăn Viƀan pơlê kong kơdrâm Đà Lạt tối ăm ‘nâi, mâu tơdroăng kố pơrá pơtối dêi pó tơkŭm po tung khế 12, drêng rơnó ôm hyô Đà Lạt – Lâm Đồng. Ing mê, pói tơngah kô mơhnhôk châ hên tơmối, veăng kum mơdêk mơnhông kơvâ ôm hyô tối krê, cheăng kâ – rêh ối pơlê pơla dêi pơlê kong kơdrâm tối tơdjuôm.