VOV4.Xơ Đăng - Hâi lơ 5/7, Vi ƀan pơlê kong kơdrâm Đà Lạt, Lâm Đồng tối ăm ‘nâi pơlê kong kơdrâm hiăng mơjiâng tôh séa ngăn kong ƀă phân mêm kŏng nghê̆ tiô rơxông nếo vâ thăm pơkuâ tơdroăng gak ngăn kong, hbrâ mơdât tơdroăng kếo kong, hdi xo tơnêi dế ai tung pơlê kong kơdrâm. Tôh pêi cheăng kố ai 7 ngế, xua Kăn phŏ pơkuâ gâk ngăn kong pơlê kong kơdrâm Đà Lạt pro tôh trương, mâu ngế ki ê cho nhân viên, kăn ƀô̆ kih thuât dêi mâu tíu cheăng pơkuâ kong ƀă mâu ngế gak ngăn kong ki troh lâp lu.

Đà Lạt xúa kŏng ngê̆ tiô rơxông nếo vâ pơkuâ gâk ngăn kong

Hnoăng cheăng Tôh pêi cheăng cho xúa mâu kơmăi kơmok kŏng ngê̆ rơxông nếo môi tiah flycam, mâu um xup vê̆ tinh Google, um xup tâi tâng ƀă hía hé vâ séa ngăn tơdroăng kong, kum tung tơdroăng gak ngăn ƀă mơnhông pêt kong, rĕng châ hlo mâu tơdroăng pro xôi ‘na kong, mâu tơdroăng kong ƀă tơnêi kong.

Tơdroăng mơjiâng tôh séa ngăn tơdroăng kong ƀă phân mêm kŏng ngê̆ rơxông nếo kố kô kum mơdât tơdroăng ko ‘nhê kong pơxâu phâk teăm tơdrêng mâu roh kếo kong, hdi xo tơnêi kong dế cho tơdroăng ki tô tuăn a pơlê kong kơdrâm.

A Sa Ly tơplôu ƀă tơbleăng