VO4.Xơ Đăng - Kơxo lơ 14/6, Hô̆i đong Pơlê kong kân Đà Nẵng tơkŭm po hneăng hôp tơdroăng cheăng ƀă tơkŭm po tơdroăng ‘na mơngế pêi cheăng ối tung hnoăng dêi Hô̆i đong pơlê kong kân. A hneăng hôp, Hô̆i đong Pơlê kong kân Đà Nẵng hiăng tơbleăng ăm pêi pro pơkâ ăm pơtê cheăng ƀă pôa Lê Minh Trung, Kăn phŏ hnê ngăn Hô̆i đong pơlê kong kân ƀă pơtê cheăng drêng cho Kăn teăng mâ Hô̆i đong pơlê kong kân hneăng má X, hneăng hơnăm 2021 – 2026.

Đà Nẵng: Ăm pơtê cheăng ƀă pôa Lê Minh Trung, Kăn phŏ hnê ngăn Hô̆i đong Pơlê kong kân

Hdrối mê, a hneăng hôp Khu pơkuâ hnê ngăn cheăng Đảng xua pôa Nguyễn Phú Trọng, Kăn xiâm pơkuâ hnê ngăn Đảng pơkuâ, Khu pơkuâ hnê ngăn cheăng Đảng hiăng pơkâ pêi pro pơxâu phâk tiô troăng: Ăm pơtê cheăng tâi tâng tơdroăng cheăng tung Đảng ƀă pôa Lê Minh Trung, Kăn cheăng tung Khu pơkuâ cheăng Đảng pơlê kong kân, Kăn phŏ pơkuâ hnê ngăn cheăng Đảng đoân, Kăn phŏ hnê ngăn hnê mơhno má môi Hô̆i đong kuăn pơlê kong kân.

Pôa Trung hiăng ôh tá aipơtâp, rak hiâm mơno lĕm, tơdroăng rêh ối; pro xôi Pơkâ ‘na mâu tơdroăng đảng viên ôh tá chiâng pêi, Pơkâ ‘na hnoăng cheăng djâ troăng ahdrối, xôi Luât on veăng ƀă rơpŏng. Tơdroăng pro xôi dêi pôa Lê Minh Trung pro ‘mêi tung pơlê pơla, tơdjâk troh tơdroăng ki loi tơngah dêi khu tơrŭm Đảng, kơ koan tơnêi têa ƀă dêi đảng viên.

            A Sa Ly tơplôu ƀă tơbleăng