VOV4.Xơ Đăng - Kơxê lơ 5/5, Vi ƀan pơlê kong kân Đà Nẵng tơkŭm po hôp séa ngăn tơdroăng hbrâ ăm Hneăng hôp tơpui tơno mơjiâng troăng tơƀai kơneăng Châu Á 2022 a khế 6 la ngiâ. Kố cho tơdroăng ki kal ƀă Pơlê kong kân Đà Nẵng tung tơdroăng pro tơniăn ôm hyô, kum po tơ’nôm mâu troăng kơneăng nếo, thăm tơrŭm mơ’no liăn cheăng ƀă mâu khu tê mơdró tơƀai pơto tơmối tung lâp plâi tơnêi. Hneăng hôp tơpui tơno mơjiâng troăng kơneăng châu Á 2022 ai 19 tơdroăng pêi cheăng ki xiâm ƀă ki kum teăng.

Tiô tơbleăng dêi Khu pơkuâ ôm hyô pơlê kong kân, xêo troh lơ 5/5, ai lối 400 kăn teăng mâ ing 155 khu tơrŭm cheăng, tíu cheăng kĭ veăng hneăng hôp tơpui tơno. A hneăng hôp tơpui tơno mơjiâng troăng kơneăng Châu Á 2022 xuân ai hên tơdroăng ki ê xua mâu Khu cheăng, kơvâ cheăng pơlê kong kân tơkŭm po môi tiah: Hneăng hôp tơpui tơno ‘’Đà Nẵng: Tíu troh ki má môi dêi châu Á’’; Tơdah ƀă pêi cheăng ƀă mâu khu mơ’no liăn ‘na tơƀai – ôm hyô; Mơđah tơbleăng tơmeăm OCOP ƀă hía hé. Tŭm tơdroăng pêi cheăng hbrâ dế châ Đà Nẵng hbrâ ƀă kêi đeăng hdrối hâi lơ 25/5 la ngiâ.

A Sa Ly tơplôu ƀă tơbleăng