Tung tơdroăng lăm pôu pêi cheăng kong têa Sinuâ ƀă tơdroăng hneăng hôp Hương Sơn Bắc Kinh roh má 10, Đăi tươ̆ng Phan Văn Giang, Kăn cheăng tung Khu xiâm kal kí, Kăn phŏ pơkuâ hnê ngăn cheăng Đảng kơvâ cheăng lêng, Ngế xiâm pơkuâ Mô đô̆i Việt Nam ƀă Khu râ kăn teăng mâ khu râ kăn xiâm Khu pơkuâ lêng Việt Nam hiăng troh lăm pôu Viê̆n khoa hok cheăng lêng khu lêng tơleăng lĕm kuăn pơlê kong têa Sinuâ ƀă Lưh đoân tơkŭm chiâng kơxô̆ 6 ối tung Grup pơkuâ khu lêng kơxô̆ 82.

Tơpui tơno ƀă khu râ kăn pơkuâ kơ koan xiâm, Đăi tươ̆ng Phan Văn Giang pói vâ Viê̆n khoa hok cheăng lêng khu lêng tơleăng lĕm kuăn pơlê Sinuâ thăm tơrŭm hriăn plĕng mâu kơ koan đông lêng dêi khu lêng kuăn pơlê Việt Nam. Ngế xiâm pơkuâ lêng Việt Nam xuân pơkâ Kơ koan xiâm khoa hok cheăng lêng  tơleăng lĕm kuăn pơlê Sinuâ ƀă Kơ koan xiâm pêi cheăng ton xŏn cheăng lêng Việt Nam thăm tơrŭm vâ rĕng kêi đeăng tơdroăng hriăn plĕng tơdjuôm ‘’Tí tăng plĕng mâu tơdroăng kal, tơmeăm khoăng ‘na tuăn pâ rŭm môi tuăn pơla péa khu lêng Việt Nam – Sinuâ, troăng tơmiât rŭm môi tuăn Hồ Chí Minh – Mao Trạch Đông tung tơplâ xâ Pơhlăng ƀă tơtrâ Mih.