A hneăng hôp tơpui tơno, péa pâ mơnhên, tơrŭm cheăng Việt Nam – Malaysia rế hía rế ai hnoăng kal tung tơrŭm cheăng pơla péa tơnêi têa, khu râ kăn pơkuâ péa tơnêi têa tơmâng, mơdêk, tơtro ƀă mâu mơ-éa tơrŭm cheăng lêng ki péa pâ hiăng kĭ, châ tơƀrê hên, má môi tung mâu kơvâ cheăng: tơpui tơno khu râ kăn xiâm, tơrŭm cheăng pơla mâu khu lêng, hnê mơjiâng, hnê mơhno ƀă môi tuăn tŏng kum dêi pó a mâu hneăng hôp tơpui tơno gâk kring kơpong ƀă lâp plâi tơnêi, pơtroh khu râ kăn veăng mâu tơdroăng ki kal xua rêm kong têa pơkuâ.

Péa Ngế xiâm mơnhên, tơmeăm ki ai hlâu ƀă tơnêi tơníu ki ai hlâu tơrŭm cheăng pơla péa tơnêi têa ối kân. Péa pâ pơtối pêi pro châ tơƀrê mâu mơ-éa, môi tuăn hiăng kĭ, ki má lối cho Hlá mơ-éa chôu vế ‘na tơrŭm cheăng lêng pơla péa pâ ki péa pâ kĭ tơkêa klêi kơ’nâi tơpui tơno, mơnhên troăng prôk la ngiâ ăm tơrŭm cheăng lêng tung la ngiâ.