Klêi kơ’nâi hmâng kăn pơkuâ kong pơlê Kon Tum pơchuât ‘na hnoăng cheăng hbrâ ăm Hâi mơdĭng Mơhno túa lĕm tro, Tơ’noăng ivá ƀă Ôm hyô mâu hdroâng kuăn ngo kơpong Tây Nguyên rôh má I, hơnăm2023, Ngế xiâm ngăn Kŏng an,Đăi tươ̆ng Tô Lâm tối rơdêi, tơdroăng ki tơkŭm po ƀlêi chiâng Hâi mơhno túa lĕm tro, Tơ’noăng ivá ƀă Ôm hyô mâu hdroâng kuăn ngo kơpong Tây Nguyên rôh má I, hơnăm 2023 a kong pơlê Kon Tum ai pơxúa khât, veăng kum rak vế, mơdêk ki kơnía ‘na túa lĕm tro Tây Nguyên.

Hâi mơdĭng xua Khu xiâm ngăn Mơhno túa lĕm tro, Tơ’noăng ivá ƀă Ôm hyô tơrŭm ƀă mâu Khu xiâm, kơvâ cheăng Tơnêi têa ƀă 5 to kong pơlê kơpong Tây Nguyên, me cho: Kon Tum, Gia Lai, Dak Lăk, Dak Nông ƀă Lâm Đồng tơkŭm po. Veăng a hâi mơdĭng ai dâng 1 rơpâu ngế ngê̆ nhân, diễn viên, mâu ngế tơ’noăng cho kuăn pơlê ƀă mâu kăn dêi mâu hdroâng kuăn ngo nôkố dế rêh ối a 5 to kong pơlê Tây Nguyên. Leh pơxiâm po hâi mơdĭng châ po a kong măng lơ 19/11 a Plông kân 16/3, pơlê kong kơdrâm Kon Tum, kong pơlê Kon Tum.