Ki nhên, tung 9 khế hơnăm 2023, khu Kan sát rak tơniăn troăng klông kŏng an kong pơlê Dak Lak hiăng châ hlo ƀă pro mơ-éa 36.258 ngế xôi a kơvâ troăng klông, tung mê, ai 8.650 ngế vê rơxế ô tô, rơxế honđa châ hlo tung châ ai pló drôu, ƀiê̆r drêng vê rơxế drô troăng kân (châ vâ chê 23,9% tâi tâng kơxô̆ mơngế pro xôi).

Ki tơtrŏng má môi hên ‘’ngế ô drôu’’ vê rơxế ô tô pro xôi ai pló drôu tung châ tro khu cheăng pơxâu phâk lăn kơlo ki kơnâ má môi ƀă kơxô̆ liăn 40 rơtuh liăn. Tung mâu ngế ki pro xôi ai hên ngế cho kăn ƀô̆, đảng viên, kŏng chưk, viên chưk. Vâ tơniăn troăng klông ƀă rơxế kơtâu troh tâi hơnăm 2023, khu kŏng an rak tơniăn troăng klông, Kŏng an kong pơlê Dak Lak hiăng mơjiâng mâu pơkâ pơtroh mơngế pêi cheăng, rơxế vâ mơdêk séa ngăn, séa ngăn mâu troăng kân tơnêi têa, kong pơlê, mâu tíu ki tơ’lêi tơklâm rơxế; đi đo pêi pro mâu tíu gâk troăng vâ ‘nâi ‘na pló drôu, matŭi... Ing mê, pơxâu phâk kơtăng mâu ngế vê rơxế ai ôu drôu, ƀier, ma tŭi, vâ kơdroh iâ má môi tơklâm rơxế tơdjâk troh kơvâ kố.