VOV4.Xơ Đăng - Kơxê lơ 6/5, Vi ƀan kong pơlê Dak Lak tơkŭm po hôp khu chêh hlá tơbeăng khế 4/2022, tối ‘na tơdroăng cheăng kâ – rêh ối pơlê pơla khế 4 ƀă tiâ tối tơdroăng xiâm mâu kơ koan chêh hlá tơbeăng tơpui tơno, séa ngăn, châ pơlê pơla rơhêng vâ ‘nâi plĕng. Tơdjâk troh tơdroăng séa ngăn, mơnhên tơdroăng pro xôi tung tơdroăng rôe kế tơmeăm khăm ngăn SARS-CoV-2 dêi Tíu xiâm mơdât pơreăng kong pơlê Dak Lak, Đăi tă Nguyễn Văn Quy, Kăn pơkuâ Ƀơrô  tơbleăng, Kŏng an kong pơlê Dak Lak tối ăm ‘nâi: Roh tơdroăng kố tơdjâk troh roh tơdroăng rôe tơmeăm khăm ngăn SARS-CoV-2 dêi Kŏng ti tơlo liăn Kŏng ngê̆ Việt Á a tung lâp tơnêi têa tung pơla kố nah.

Tíu pêi cheăng xiâm mơdât pơreăng kong pơlê Dak Lak

Troh nôkố, Kơ koan Kan sát séa ngăn, Kŏng an kong pơlê Dak Lak hiăng mơnhên Tíu xiâm Mơdât pơreăng kong pơlê hiăng rôe lối 63 rơpâu khu tơmeăm khăm ngăn, ƀă tâi tâng kơxô̆ liăn lối 10 rơtal liăn. Klêi kơ’nâi séa ngăn, mơnhên, chêh xo tơdroăng, kơ koan cheăng hiăng mơnhên châ roh tơdroăng ai pro xôi luât.

Tơdjâk troh tơdroăng nếo tối mê, khu séa ngăn kong pơlê Dak Lak xuân dế séa ngăn tơdroăng rôe tơmeăm khăm ngăn, tơmeăm khăm pơlât, vaccine ƀă pơkeăng hbrâ mơdât pơreăng COVID-19 tung kong pơlê.

A Sa Ly tơplôu [ă tơbleăng