Đảng ƀô̆ kong pơlê Dak Lak nôkố ai 20 Đảng ƀô̆ ối tung khu pơkuâ ngăn Đảng kong pơlê, 843 kuh tơrŭm Đảng, ƀă lối 83 rơpâu ngế đảng viên. Tung tơdroăng ki hơniâp ro, mâu kăn hiăng rơtế hơ’muăn khôi hmâ, pơxiâm ai mâ dêi Chi ƀô̆ Kŏng san ki apoăng dêi kong pơlê, xiâm kối dêi Đảng ƀô̆ kong pơlê Dak Lak nôkố.

Môi hiâm mơno pleăng reăng, chôu nhăng tơbâ mâu lêng kăch măng hiăng hlâ akố. Pôa Lại Đức Đại, kăn phŏ pơkuâ ngăn Khu mơhno túa lĕm tro, Tơ’noăng ivá ƀă Ôm hyô Dak Lak, tíu pêi cheăng pơkuâ ngăn Hngêi phak Ƀuôn Ma Thuột ăm ‘nâi, a hâi lơ 23/11 rêm hơnăm, kong pơlê Dak Lak hmâ tơkŭm po Leh chôu nhăng tơbâ a Hngêi phâk, tối tơdroăng ki pâ mơnê troh mâu pâ pôa ngoh nâ ki prôk hdrối hiăng pleăng dêi mơheăm chhá vâ mơjiâng ƀă mơnhông kong pơlê Dak Lak châ tơƀrê môi tiah nôkố.