Pôa Phan Xuân Bách, Kăn phŏ pơkuâ rak ngăn tơdroăng tơkêa bro troăng prôk ƀă ngăn pêi chiâk kong pơlê Dak Lak ăm ‘nâi, klêi hên hdrôh pơtroh hlá mơ-éa pâ thế, mơ’nui khế 10/2023, Khu xiâm ngăn troăng prôk hiăng pơkâ ‘mâi hơ’lêh troăng rơhlâ tơdroăng tơkêa bro mơjiâng troăng kân Hồ Chí Minh troăng ví peăng mâ hâi lo pơlê kong kong  kơdrâm Ƀuôn Ma Thuột.

Ing mê, tâi tâng kơxô̆ liăn ‘no mơjiâng tơdroăng tơkêa pro châ ‘mâi hơ’lêh sap 1.500 rơtal liăn tâk troh 1.841 rơtal liăn. Tâi tâng kơxô̆ liăn 341 rơtal tâk tơ’nôm ki hên vâ tơ’nôm a peăng kơxô̆ liăn ‘mâi xĕn tơnêi, kơxô̆ liăn hrê ki ê tung pơla pro tơdroăng tơkêa bro.  Klêi châ ăm tŭm kơxô̆ liăn, Ngế pơkuâ ngăn mơjiâng pro hiăng hnê mơhno ăm tíu pêi cheăng tơdjâk troh rĕng pro, hlối ‘mâi xĕn hngêi trăng tơnêi tíu, hlối pro vâ teăm kêi a hơnăm 2024.