A roh leh, Khu tơkŭm po hiăng diâp 2 pri A; 4 pri B; 6 pri C ƀă 10 pri mơhnhôk troh mâu ngế chêh, khu chêh. Khu tơkŭm po xuân hiăng séa ngăn, rah 34 ƀai ki hôm, pơtroh veăng Tơ’noăng Chêh hlá tơbeăng lâp tơnêi têa ‘na mơjiâng Đảng (Pri Búa Liềm vàng) roh má IX, hơnăm 2024.

Kố cho mâu ƀai ki hôm má môi, tung kơxô̆ 210 ƀai châ rah xo. Pri hơnăm kố châ mơnhên mâu tơdroăng veăng gum ki má môi tung tơdroăng chêh tối mâu tơdroăng mơjiâng Đảng, ki má lối cho tơdroăng mơjiâng, pơhlêh tung Đảng, gâk kring xiâm kối troăng tơmiât, tơplâ hbrâ, mơdât kâ kơhveăm liăn ngân, tơdroăng ki ôh tá lĕm tro.

Ki rơhêng vâ tối, hên ƀai hiăng djâ mâu tơdroăng pơtâng hnê tối trâu hơngế, mơjiâng tơdroăng ki pơhlêh tơtro tung pơlê pơla. Xuân a roh leh, jâ Huỳnh Thị Chiến Hòa, Kăn phŏ hnê mơhno má môi Khu pơkuâ hnê ngăn Đảng kong pơlê, Kăn hnê ngăn Hô̆i đong kuăn pơlê kong pơlê Dak Lak hiăng thế pêi pro Tơ’noăng chêh hlá tơbeăng ‘na mơjiâng Đảng kong pơlê Dak Lak roh má VII, hơnăm 2025.