VOV4.Xơ Đăng - Kơxo lơ 29/5, a pơlê kong krâm Ƀuôn Hồ, Khu pơkuâ ngăn Đoân Droh rơtăm Dak Lak tơkŭm po Leh droh rơtăm lo lăm pleăng hnoăng cheăng hơnăm 2022 ƀă hên tơdroăng ki má môi a 15 tơring, pơlê kong krâm, pơlê kong kơdrâm tung kong pơlê Dak Lak ƀă veăng amê ai lối 10 rơpâu ngế đoân viên, droh rơtăm tâi tâng kong pơlê.

Dak Lak: Droh rơtăm lo lăm pleăng hnoăng cheăng rơnó pơtê hơnăm 2022

A leh lo lăm pleăng hnoăng cheăng, Khu pơkuâ Đoân Droh rơtăm Dak Lak mơ’no kơxô̆ liăn 150 rơtuh liăn tŏng kum tăng cheăng pêi ăm droh rơtăm. Diêp 200 loăng ngiât, 1 tơmeăm troăng on tơhrik bâ eăng, hngêi tuăn pâ, tơmeăm tíu xah hêi vâi hdrêng ƀă vâi hdrêng ƀă tŏng kum mơjiâng 1 to plông hngêi hôp tơdjuôm pơlê pơla ƀă tâi tâng kơxô̆ liăn 370 rơtuh liăn.

Nâ H’Giang Niê, Kăn pơkuâ hnê ngăn cheăng Đoân Droh rơtăm kong pơlê Dak Lak tối ăm ‘nâi, mâu tơdroăng tung tơdroăng droh rơtăm pleăng hnoăng cheăng hơnăm 2022 vâ mơnhông mơdêk hiâm mơno djâ troăng ahdrối, pleăng hnoăng cheăng dêi droh rơtăm tung veăng mơnhông cheăng kâ – rêh ối; mơjiâng thôn pơlê nếo, tíu kơdrâm kuăn pơlê rêh ối rơkê; tơniăn tơdroăng rêh ối pơlê pơla, cheăng lêng, gak kring, ki má lối cho a mâu pơlê ki pá puât, kơpong hơngế hơngo, tíu tơkăng kong.