Tiô kơxô̆ tối tơbleăng dêi Vi ƀan hnê ngăn kong pơlê Dak Lak, pơla hơnăm 2016-2020, Dak Lak tơ’mot ai 329 tơdroăng tơkêa pro ‘no liăn cheăng, ƀă tâi tâng kơxô̆ liăn 57.000 rơtal liăn. Riân tung pơla nôkố, rêm hơnăm kong pơlê ai 65 tơdroăng tơkêa bro châ ăm phêp mơjiâng pro, ƀă tâi tâng kơxô̆ liăn dâng lối 11 rơpâu 400 rơtal liăn.

La sap hơnăm 2021 troh nôkố, lâp tung kong pơlê bú ai 48 tơdroăng tơkêa bro châ ăm hlá mơ-éa pơkâ pêi tiô troăng rơhlâ ‘no liăn cheăng, tâi tâng kơxô̆ liăn 28.000 rơtal liăn, riân rêm hơnăm bú ai 16 tơdroăng tơkêa bro, tâi tâng kơxô̆ liăn lối 9.000 rơtal liăn.

Ki xiâm  dêi tơdroăng  kơdroh tơdroăng tơkêa bro ƀă kơxô̆ liăn ‘no pêi cheăng  a kong pơlê tung 3 hơnăm hdrối cho xua ai pơreăng COVID-19, tơdroăng cheăng kâ tung lâp plâi tơnêi ƀă tung tơnêi têa ai  pơ’lêh hên; hên khu mơdró kân trâm pá, tung pơla mê khu mơdró kŭn ƀă krâ kơvâ pêi cheăng ôh tá châ tơƀrê tá ai tơdroăng tơkêa bro ki kân, mê  xiâm liăn ‘no pêi cheăng chiâng  iâ há.