Tơbleăng mâu pơkâ dêi luât ‘na tơnêi, kong pơlê Dak Lak séa ngăn ai lối 188 rơpâu ha tơnêi dêi mâu tơnêi pêi chiâk tơnêi kong dêi kong pơlê pơcháu ăm râ tơring rak ngăn. Mơhé ti mê, troh khế 7.2024, kong pơlê nếo kĭ 2 troăng hơlâ xúa tơnêi ai xiâm rêi tơnêi pêi chiâk deăng tơnêi pêt loăng kong xua Vi ƀan Kuăn pơlê mâu tơring, pơlê kong krâm, pơlê kong kơdrâm mơjiâng, 20 troăng hơlâ ki u ối dế tung pơla ‘mâi hơ’lêh, tơ’nôm pê klêi , hâi kĭ.

Pôa Nguyễn Thiên Văn, Kăn phŏ hnê ngăn Vi ƀan kuăn pơlê kong pơlê Dak Lak ăm ‘nâi, tơdroăng hrá kĭ mâu troăng hơlâ xúa tơnêi ƀă mâu tơnêi ki xiâm cho tơnêi pêi chiâk, tơnêi pêt loăng kong xúa tơdjâk kân troh tơdroăng tăng tơ’mot khu ‘no liăn cheăng, rêh ối pơlê pơla, mơnhông tê mơdró a kong pơlê. Xua mê, vâ luât tơnêi hơnăm 2024 châ xêt khât, tơleăng klêi mâu tơdroăng tơdjâk troh lối tơdế rơtuh ha tơnêi ki ai xiâm ing kong ki pêt, kal thế tơrŭm krá ƀă mâu tíu mơjiâng pro, kơvâ cheăng  ƀă mâu kăn râ tơring.