VOV4.Xơ Đăng - Hâi lơ 17/5, Khu kăn Kuô̆k hô̆i kong pơlê Dak Lak hiăng ai rôh pêi cheăng ƀă Vi ƀan hnê ngăn kong pơlê ƀă mâu khu râ, kơvâ cheăng vâ hbrâ mâu tơdroăng ki kal veăng a rôh hôp má 3, Kuô̆k hô̆i hneăng má 15. Hên rơkong tơpui tối ai tơdjâk troh troăng hơlâ tung mơnhông mơdêk cheăng kâ rêh ối pơlê pơla dêi kong pơlê hiăng châ ‘mot tơ’nôm tung kơxop hlá mơ-éa tối tơbleăng ăm Kuô̆k hô̆i.

A rôh pêi cheăng, teăng mâ kăn pơkuâ mâu khu râ, kơvâ cheăng kong pơlê Dak Lak hiăng tối hên tơdroăng ki xơpá ƀă pơkâ thế tơnêi têa séa ngăn, tah lôi mâu tơdroăng pơkâ pêi pro ki xơpá ăm tơdroăng ki mơnhông mơdêk cheăng kâ rêh ối pơlê pơla a kong pơlê tung la ngiâ, môi tiah mơjiâng pro on tơhrik ki vêh pro nếo pơkâ troăng mơnhông troh hơnăm2045, Chin phuh, Khu xiâm ngăn cheăng kơmăi kơmok ƀă tê mơdró kal séa ngăn ‘mâi rơnêu mơdêk ivá rơdêi vâ mơjiâng pro on tơhrik ki vêh mơjiâng pro nếo a Dak Lak.

Mâu kăn veăng tơpui tối pâ thế troh ƀă khu kăn Kuô̆k hô̆i

Mâu kăn xuân pâ thế hên tơdroăng ki kal ai tơdjâk troh kơvâ cheăng tung kơdâm tơnêi, séa ngăn troăng pơkâ xiâm ăm pơlê kong kơdrâm Ƀuôn Ma Thuột, hnoăng cheăng pơkâ, xúa tơnêi; tơdroăng ki ai mâu tíu troăng, troăng kân dế hiăng tơ’nhiê la tá hâi châ kum liăn vâ ‘mâi rơnêu. Khu kăn Kuô̆k hô̆i kong pơlê Dak Lak tơmâng xo mâu rơkong tơpui tối, pâ thế dêi mâu kăn, chêh tơkŭm tung mơ-éa vâ pơtroh ăm Kuô̆k hô̆i ƀă Khu xiâm kơvâ cheăng séa ngăn.

Katarina Nga tơplôu ƀă tơbleăng