Ƀă mâu troăng pêi ‘’tơmâng ƀă pêi pro’’ a hneăng hôp tơpui tơno ƀă khu tê mơdró kong pơlê Dak Lak hơnăm 2023 tơkŭm po lơ 19/10, khu râ kăn pơkuâ kong pơlê hiăng tơdah châ hên rơkong veăng tơpui tối dêi mâu khu tê mơdró, tung mê, ai mâu tơdroăng ki ôh tá tơniăn ki kong pơlê dế ti tăng troăng tah lôi. Tiô tơdroăng a hneăng hôp, troh nôkố ki hên khu tê mơdró a Dak Lak hiăng hbrâ, mơ-eăm tah lôi pá puât, mơdêk mơjiâng tơmeăm, tê mơdró, tơniăn tơdroăng rêh ối ăm mơngế pêi cheăng.

Laga, tơdroăng pro mơ-éa xuân cho tơdroăng ki mâu khu tê mơdró a kong pơlê ôh tá môi tuăn. Klêi kơ’nâi tơmâng rơkong tơpui dêi khu tê mơdró ƀă mâu tơdroăng xiâm tiâ tối dêi khu râ kăn pơkuâ mâu khu, kơvâ cheăng, pôa Phạm Ngọc Nghị, Kăn hnê ngăn Vi ƀan kong pơlê Dak Lak hiăng tiâ tối nhên tâ mâu tơdroăng ki kuăn pơlê rơhêng vâ ‘nâi plĕng, pâ thế dêi khu tê mơdró a rêm kơvâ cheăng ki nhên. Tơdrêng amê hnê mơhno mâu kơ koan, tíu cheăng kal thế mơ-eăm hên tâ tung tŏng kum khu tê mơdró.