VOV4.Xơ Đăng - Pêi pro tơdroăng rah ăm tơtro tung khu pêi cheăng, mơdêk châ tơƀrê tơdroăng cheăng kal kí tiô Pơkâ Tơnêi têa 6 hneăng XII, troh hơnăm 2025, kong pơlê Dak Lak kô kơdroh lối 3.800 ƀiên chê̆ kŏng chưk, viên chưk pêi cheăng tung mâu kơvâ râ kong pơlê, mâu tíu pêi cheăng tơnêi têa. Tiô tơbleăng dêi Khu pơkuâ kăn ƀô̆ kong pơlê Dak Lak, tung hơnăm 2021, kong pơlê hiăng kơdroh lối 10% kơxô̆ ƀiên chê̆, tơdâng 1.500 ngế.

Kơvâ hnê hriâm Dak Lak kô trâm hên pá puât drêng pêi pro kơdroh ƀiên chê̆

Sap ing kố troh hơnăm 2025, tiô tối hdrối lâp kong pơlê pơtối kơdroh lối 3.800 kăn ƀô̆, kŏng chưk, viên chưk mâu kơvâ cheăng râ kong pơlê ƀă mâu tíu cheăng tơnêi têa. Pôa Bạch Văn Mạnh, Kăn pơkuâ Khu pơkuâ kăn ƀô̆ kong pơlê Dak Lak tối ăm ‘nâi: kô ai hên tơdroăng pá puât nếo drêng kơdroh ƀiên chê̆, ki má lối ƀă kơvâ ngăn pơkeăng ƀă khăm pơlât ƀă hnê hriâm. Laga kong pơlê khŏm pêi pro tơdroăng kố tiô troăng pơkâ. A ngiâ, hơnăm 2022 kơdroh dâng 800 viên chưk, pơtối mê kô kơdroh dâng 1 rơpâu ngế viên chưk rêm hơnăm.

A Sa Ly tơplôu [ă tơbleăng