Kum kuăn pơlê mơdêk hlê plĕng xúa on tơhrik tơniăn kơdĭng, tung pơla hdrối kố nah Kŏng ti ngăn on tơhrik Dak Lak đi đo tơbleăng mâu troăng hơlâ hnê tối. Kơvâ ngăn on tơhrik hiăng hnê thế kơdĭng on tơhrik ăm tơbleăng tung hlá tơbeăng rơ’jíu um tơvi, tung website, pano, ing hlá mơ-éa hnê mơhno dêi rêm râ mâu kăn, xoăng ăm hlá mơ-éa krê  ăm mơngế ki xúa on tơhrik, mơdêk hnê tối tung hngêi trung... ki vâ tối cho rôh mơhnhôk “mâu rơpŏng kơdĭng on tơhrik tung hơnăm 2024” châ tơbleăng ƀă kô mơhá ăm 300 ropŏng ki ‘nâi xúa kơdĭng.

Hneăng tơ’noăng “Hok tro ƀă ki hlê plĕng tung xúa on tơhrik - ‘nâi kơdĭng - tơƀrê’’ tơ’mot lối 10 rơpâu ƀai tơ’noăng. Ƀă mâu troăng hơlâ pêi tơdrêng, 9 khế hdrối, lâp tung kong pơlê Dak Lak hiăng kơdĭng vâ chê 60 rơtuh kWh on tơhrik, tung mê vâ châ tơdế cho kơdĭng on tơhrik tung tơdroăng xúa rêm hâi.