VOV4.Xơ Đăng - Tơdroăng Tŏng kum a rơnó tơ’noăng hơnăm kố a kong pơlê Dak Lak hiăng tơ’mot lối 1 rơpâu ngế ki pleăng hnoăng cheăng cho sinh viên mâu hngêi đăi hok, kao đăng ƀă hok tro mâu hngêi trung kâ̆p ƀă râ má pái phôh thong tung kong pơlê chêh inâi veăng. Kố cho khu ki kum mâu hok tro tơ’noăng râ má pái phôh thong hiăng vâ troh la ngiâ a hâi lơ 7 ƀă lơ 8/7 la ngiâ. A rêm tíu tơ’noăng kô ai mâu khu ki pleăng dêi hnoăng ƀă tơdroăng ki pơra phá dêi rơpó môi tiah: mơhnhôk mâu ngế veăng kum, kế kâ, têa ôu ƀă liăn hriâm rơkê kum mâu hok tro ki ai tơdroăng rêh ối xơpá; kum hok tro ƀă nôu, pâ nhŏng o ai kuăn tơ’noăng tung pơla tơ’noăng; hnê mơhno troăng prôk, gâk kring tơniăn a tíu tơ’noăng, tŏng kum hnoăng cheăng pế pơchên kế kâ, rak vế tơdroăng a tíu tơ’noăng.

Ai lối 1 rơpâu ngế pleăng dêi hnoăng kô veăng kum tung rơnó tơ’noăng a Dak Lak hơnăm kố

Khu sinh viên kong pơlê Dak Lak ăm ‘nâi, rơtế ƀă tơtrŏng tŏng kum mâu hok tro ai tơdroăng rêh ối xơpá, kuăn tê, kơpong hngế hngo, hơnăm kố, tơdroăng tŏng kum rơnó tơ’noăng kô tơmâng troh mâu nôu pâ, nhŏng o ki ai ngế tơ’noăng, malối cho mâu ngế ki xơpá kal châ tŏng kum.

Katarina Nga tơplôu ƀă tơbleăng