VOV4.Xơ Đăng - Hneăng hôp kăn teăng mâ roh má 8, hneăng hơnăm 2022 – 2027 dêi Khu lo tŏng veăng kong pơlê Dak Lak tơkŭm po tung 2 hâi lơ 20 – 21/6. Tơdroăng châ tơƀrê ki má môi dêi Khu tung hneăng cheăng hiăng hluâ cho mơhnhôk châ lối 408 rơtal liăn ăm mâu tơdroăng tŏng kŭm mơngế hliăng tiâ xahpá a kong pơlê, tâk vâ chê péa xôh tâng pơchông ƀă hneăng hdrối nah.

Khu xiâm pơkuâ Khu lo tŏng veăng Việt Nam Diâp kih niê̆m chương ‘’Xua tơdroăng tŏng kum mơngế pá puât’’ ăm 5 ngế krê a Dak Lak hiăng châ tơƀrê tung mâu tơdroăng tŏng kum mơngế pá puât

Tung plâ 5 hơnăm hiăng hluâ, Khu lo tŏng veăng kong pơlê Dak Lak hiăng tŏng kum thâ ƀă tŏng kum ăm lối 868 rơpâu roh ngế, ƀă tâi tâng kơxô̆ liăn vâ chê 342 rơtal liăn, ing mâu tơdroăng môi tiah tơdroăng pêi “Têt kum mơngế kơtiê ƀă mơngế tro trếo ‘mêi dioxin’’, tơdroăng pêi ‘’Tŏng kum ăm ro păn’’, tơdroăng  pêi “Kum châ tơdroăng pói vâ’’.

Tung la ngiâ, mâu khu lo tŏng veăng a Dak Lak pơtối pêi pro châ tơƀrê Roh mơhnhôk ‘’Rêm khu pú hên, ngế krê kum môi tíu mơngế xahpá’’; rak pơkuâ ƀă mơnhông mơdêk Tơdroăng pêi Tŏng kum ăm ro păn, kum mâu rơpŏng kơtiê pơ’lêh troăng tăng cheăng pêi krá tơniăn; mâu tơdroăng pêi, troăng pêi ‘’Têt kum mơngế kơtiê ƀă mơngế tro trếo ‘mêi dioxin’’, ‘’Khế tŏng kum mơngế xahpá’’, ‘’Hơpiâp kâ tuăn pâ’’, ‘’Kơđiah hmê kum ăm mơngế kơtiê’’, rak ngăn ivá  kuăn pơlê.

A Sa Ly tơplôu ƀă tơbleăng