Pôa Nguyễn Tài ối a thôn 15, cheăm Ea Yông, tơring Krông Păč, kong pơlê Dak Lak drêng troh pro hlá mơ-éa a tíu pêi cheăng “Tơkŭm tâi tâng môi tíu” a Vi ƀan cheăm Ea Yông. Pôa Nguyễn Tài tối, tơdroăng mâu khu râ kăn pơkuâ mơdêk pơ’lêh pro hlá mơ-éa tung pơla kố nah hiăng djâ pơxúa kal khât ăm kuăn pơlê, khu pú hên, khu tê mơdró.

Tung mê, châ tơƀrê tơxâng kheăn kơdeăn má môi cho “Trang Zalo tơdjêp tâi tâng kuăn pơlê” tung tơdroăng pro hlá mơ-ea a cheăm.

“Drêng á troh pro hlá mơ-éa a kơ koan pơkuâ pro mơ-éa dêi cheăm. Á hlo mê cho tơdroăng ki rơkê ƀă pro ăm kuăn pơlê tá hiâm mơno dêi mâu kăn ƀô̆ tung khu pơkuâ pro hlá mơ-éa dêi cheăm. Drêng kuăn pơlê ai tơdroăng kal vâ ‘nâi tơpui tơno ‘na mâu tơdroăng pro mơ-éa mê kô chiâng tơpui tơdrêng tung khu Zalo’’.

Rơtế ƀă troăng pêi “Trang Zalo tơdjêp tâi tâng kuăn pơlê”, tung pơla kố nah, mâu troăng pêi môi tiah: “Hâi má 4 mơ’no tơdrêng tung um tiô troăng hyôh măng”, “Hâi ôh tá chêh”, “Hâi ôh tá trâm” hiăng châ mâu tơring tung kong pơlê Dak Lak pêi pro vâ pro tơ’lêi hlâu pro mơ-éa. Drêng kuăn pơlê troh tíu pêi cheăng “Tơkŭm tâi tâng môi tíu” vâ pro mâu hlá mơ-éa pro môi tiah, mơnhên mơ-éa, mâu mơ-éa; pêi pro mâu mơ-éa kĭ mơjiâng on veăng; mơ-éa kĭ pro khai sanh ƀă mơ-éa mơnhên hiăng hlâ kô châ pro a tơdrêng ƀă troăng pêi 5 troăng: kơ-êng, tơdah, tơleăng, kĭ ƀă mơdrếo tơdroăng hiăng klêi pro.

Jâ Nguyễn Thị Thúy Sinh, kăn ƀô̆ Ƀơrô – Riân tơmeăm khoăng Vi ƀan cheăm Ea Yông, tơring Krông Păč, kong pơlê Dak Lak tối ăm ‘nâi:

“Vi ƀan cheăm hiăng pêi pro hên troăng pêi vâ pêi pro troh kuăn pơlê. Tơrŭm ƀă khu hnê mơhno tơdroăng tơkêa bro 06, khu hnê mơhno pơ’lêh pro mơ-éa pêi pro troăng pêi “1000 kuăn pơlê xúa kŏng ngê̆’’ tung cheăm Ea Yông. Kuăn pơlê drêng troh tơpui pêi pro mâu mơ-éa a cheăm mê kô chiâng nâp hô sơ tơdrêng tung troăng măng pơlê pơla vâ kơdroh kơxô̆ liăn ƀă hâi khế prôk lăm’’.

Tơdroăng pêi pro mâu troăng hiăng kơdroh hâi khế tơleăng mâu tơdroăng pro mơ-éa râ cheăm, bêng. Kuăn pơlê kal troh môi xôh, tơkôm tung pơla iâ chôu vâ tơdah tơdroăng châ tơƀrê. Mâu troăng pêi kố ôh tá xê kum mơdêk kơlo têk chu hô sơ pro hlá mơ-éa râ cheăm, bêng châ pro tro hâi khế, kum kuăn pơlê, khu tê mơdró kơdroh hâi khế, kơxô̆ liăn tung pêi pro mơ-éa mê ối mơjiâng khu kăn ƀô̆, kŏng chưk ai hiâm mơno pôu râng hnoăng cheăng, hiâm mơno lĕm pêi cheăng tơdroăng tơnêi têa.

Pôa Nguyễn Thanh Vũ, Kăn hnê ngăn Vi ƀan tơring Krông Ana mơnhên tối:

“Tơdroăng pơ’lêh nếo tơmiât pêi rơkê tung pêi pro mơ-éa, kăn pơkuâ mâu kơ koan tíu cheăng hnê mơhno pơkuâ đi đo séa ngăn, mơhnhôk, kăn ƀô̆ kŏng chưk pêi pro hnoăng cheăng kheăn hôu tung pro mơ-éa, tơdroăng xiâm pơkuâ, pơkâ pêi cheăng dêi kơ koan tíu cheăng ƀă mơnhên dêi kuăn pơlê ‘na hiâm mơno pêi cheăng xuân môi tiah tơpui tơno ƀă kuăn pơlê’’.

Tiô mơnhên a ‘’Hneăng hôp mơgêi 9 khế ‘na tơdroăng pro mơ-éa dêi kong pơlê Dak Lak hơnăm 2023’’, cho tơdroăng ki veăng tơdâng tơ’mô, kơtăng dêi mâu khu cheăng, kơvâ cheăng tung pơla kố nah hiăng kum tơdroăng pơ’lêh pro mơ-éa dêi kong pơlê hiăng châ pơ’lêh tơtro, kum tơtro tâ pơkâ dêi kuăn pơlê ƀă khu tê mơdró.

Tơdroăng tơdah, pro hô sơ ối tung kơpong pơkuâ dêi kong pơlê hiăng châ pêi pro tơtro, kơdroh tơdroăng ki hrá tung pro hô sơ; kơtăng pêi pro tơdroăng pâ pôi tá ‘nhó kuăn pơlê, khu pú hên drêng ai tơdroăng pro hrá tiô tơkêa. Tiô riân ăm hlo, tơdroăng châ tơƀrê pro hô sơ troh hâi khế tơkêa, hdrối hâi khế pơkâ tung kong pơlê châ lối 99%.

Vâ pơtối ƀă pơkâ ‘’Xo kuăn pơlê ƀă khu tê mơdró pro tíu xiâm vâ tơdah pro’’. Pôa Nguyễn Tấn Hà, Kăn phŏ hnê ngăn Vi-ƀan kong pơlê Dak Lak mơnhên:

“Tung la ngiâ kô tơkŭm po môi Hneăng hôp vâ séa ngăn tơdroăng pêi cheăng xuân môi tiah pá puât ki trâm vâ ai hnê mơhno tah lôi pá puât. Má péa, cho séa ngăn riân vâ môi tuăn kơxô̆ mơ-éa châ tơbleăng pêi pro tung tíu chôu ‘măn tơdroăng kal tơnêi têa. Má pái cho pơkuâ tơbleăng ăm Vi ƀan kong pơlê mơ-éa hnê mơhno pêi pro mâu hnoăng cheăng pro mơ-éa sap ing kố troh tâi hơnăm 2023. Mơnhên tâi tâng mâu tơdroăng mơdró tơnêi têa tơdrêng tung troăng măng pơlê pơla vâ ing mê rah xo mâu mơdró tơnêi têa ki kal, tơdroăng ki xúa hên, ƀă tơdroăng kal vâ rêm hâi dêi kuăn pơlê, khu tê mơdró’’.

Tơdroăng Dak Lak khŏm mơdêk pơ’lêh pro mơ-éa pơkuâ châ ngăn cho troăng pêi pơ’lêh kal khât, mơjiâng troăng mơnhông ăm kong pơlê mơnhông rĕng ƀă krá tơniăn, tơtro pơkâ mơnhông tơdjuôm tiô pơkâ kơxô̆ 23 –NQ-TW hâi lơ 6/10/2022 dêi Khu xiâm kal kí ‘na troăng mơnhông cheăng kâ – rêh ối pơlê pơla ƀă tơniăn cheăng lêng, gâk kring kơpong Tây Nguyên troh hơnăm 2030, tơmiât pêi troh hơnăm 2045.