Tiô tối tơbleăng pơxá ối má to lâi kơlo kơxô̆ ivá tơbriât cheăng râ kong pơlê hơnăm 2022, kong pơlê Dak Lak châ 60,91 điêm, ối má 60/63 kong pơlê, ối má mơ’nui kơpong Tây Nguyên. Tiô pơkâ ki nếo, Vi ƀan kong pơlê Dak Lak pơkâ mơhno tơbleăng PCI hơnăm 2023-2025 dêi kong pơlê sap ing da dâk tơngi klêng ƀă kơlo kơxô̆ điêm châ pơxá kơpêng 6.

Pakĭng mê, vâ tối 7 khu troăng rơhlâ kal pêi kơtăng tơbleăng pêi pro. Tung mê, mơdêk hnoăng cheăng, hbrâ dêi mâu tíu pêi cheăng, kơvâ cheăng, Vi ƀan mâu tơring, pơlê kong krâm ƀă pơlê kong kơdrâm; mơdêk ‘mâi hơ’lêh tơdroăng cheăng, kơdroh hâi chôu pro hlá mơ-éa tơdjâk troh ‘no liăn cheăng, tê mơdró dêi khu mơdró, kơdroh kơxô̆ liăn nâp cheăng mơdró kâ, ‘na tơnêi tơníu, mơdêk trâm mâ, tơpui tơno, tơleăng mơnhên mâu tơdroăng pá, tơvâ tơvân dêi mâu khu mơdró.