VOV4.Xơ Đăng - Tung péa hâi lơ 14 ƀă 15/4, Hô̆i đong hnê ngăn kong pơlê Dak Lak hiăng pêi pro séa ngăn tơdroăng ki kal ƀă mâu tơring,cheăm ƀă Vi ƀan hnê ngăn kong pơlê ‘na pơkâ tơleăng đơn kơthô, pơsăm tối, pơsăm tơkêng dêi kuăn pơlê hneăng hơnăm 2016 – 2021. Tiô tối tơbleăng dêi Vi ƀan hnê ngăn kong pơlê Dak Lak, sap ing hơnăm 2016 – 2021, lâp kong pơlê Dak Lak hiăng tơdah xo vâ chê 9.100 đơn pơsăm tối, pơsăm tơkêng ƀă lối 33.800 đơnpâ thế, tối tơbleăng.

Khu kăn séa ngăn Hô̆i đong hnê ngăn kong pơlê Dak Lak pêi cheăng ƀă Vi ƀan hnê ngăn kong pơlê Dak Lak.

Ki hên mâu rôh pơsăm tối, tối ‘na mâu tơdroăng ki ôh tá tro hiăng châ kơ koan ai hnoăng pơkuâ séa ngăn, tơleăng mơnhên rak tơniăn tơbleăng tơdrăng, tro luât. Tung la ngiâ, Vi ƀan hnê ngăn kong pơlê Dak Lak kal pơtối pơkâ thế ƀă tơleăng mơnhên tơdroăng ki pơsăm tối, pơsăm tơkêng; mơdêk hnoăng cheăng rak ngăn tơdroăng ki pro túa pơkâ, túa pơkâ xúa tơnêi, rak tơniăn tơbleăng tơdrăng. Malối kal tơmâng ngăn tâ néo troh tơdroăng ki hnê mâu ngế vâ pêi cheăng vâ pêi pro châ tiô tơdroăng pơkâ thế hnoăng cheăng pơkâ tơleăng đơn kơthô, pơsăm tối, pơsăm tơkêng.

Katarina Nga tơplôu ƀă tơbleăng