Jâ H’Hương H’Wing, kuăn ngo Rơđế, ối a ƀuôn M’Blôc Ƀ, cheăm Krông Jing, tơring M’Drak, kong pơlê Dak Lak hên hơnăm hlối châ vâi pôk pro kăn pơkuâ hnê ngăn Chi ƀô̆. Tơdrêng ƀă tơdroăng hnê mơhnhôk kuăn pơlê pêi pro tro mâu troăng rơhlâ dêi Đảng, Luât dêi Tơnêi têa, jâ H’Hương ối cho ngế ki djâ troăng ahdrối tung tơdroăng pơ’lêh hdrê pêt, păn mơnăn, mơnhông cheăng kâ tung rơpŏng hngêi.

Jâ tối, kơnôm veăng pêi pro mâu tơdroăng hnê mơhno mơdêk hnoăng cheăng pêi ăm mâu kăn ƀô̆ kơpong hdroâng kuăn ngo a pơlê cheăm, jâ hiăng châ hriâm hên túa cheăng ki tro, ‘ló, pêi tơdrêng ăm tơdroăng cheăng dêi tơná.

 “Tơdroăng kơdroh kơklêa - xăm kơtiê tung pơlê cho tơdroăng cheăng ki kal. Pơlê đi đo cho xiâm dêi tơdroăng pơkâ kăn xiâm hnê mơhno ăm khu xiâm thế achê kuăn pơlê, hmâ ƀă kuăn pơlê, hnê kuăn pơlê mơnhông cheăng kâ, ‘nâi xúa khoa hok kih thuât tung păn ro, păn chu. ‘Nâi rơnó ki lâi mơdâ hdrê ăm teăm hâi khế mê pơlê chôa kơdroh kơklêa - xăm kơtiê’’.

Kơnôm hlê trâu tơdroăng rêh ối, túa tơlá dêi hdroâng kuăn ngo tơná, tơ’nôm ƀă tuăn khên tơmiât, khên pêi, khên pôu râng dêi mâu tơdroăng, mâu kăn ƀô̆ đảng viên mơngế hdroâng kuăn ngo hiăng pêi tro hnoăng cheăng ki hiăng pơcháu. Ing mê, veăng kring vế tơniăn pơlê cheăm, mơdêk pêi cheăng kơdroh kơklêa, xăm kơtiê, mơnhông cheăng kâ, rêh ối dêi kong pơlê.

Pôa Trần Hồng Tiến, kăn pơkuâ hnê ngăn Đảng tơring Krông Pač tối:

 “Ƀă kăn ƀô̆ ngin rah xo mâu ngế hơnăm ối nếo mâu hdroâng kuăn ngo a mâu cheăm ki rơkê chiâng pêi cheăng vâ rak ăm  pêi mâu tơdroăng cheăm xiâm ăm pro kăn dêi mâu pơlê rôh apoăng hlo mâu ki mê pê klêi hnoăng cheăng châ pơcháu ƀă châ kuăn pơlê  loi nhoăm”.

Tung lâp kong pơlê Dak Lak nôkố, kơxô̆ kăn ƀô̆, mơngế pơkuâ, mơngế cheăng cho mâu kăn ngo tâk 13%. Tiê̆n sih Nguyễn Thành Dũng, Thái pơkuâ hngêi trung Chính trị kong pơlê Dak Lak tối ăm ‘nâi, mâu kăn ƀô̆ kuăn ngo xuân châ kum ăm hriâm tơ’nôm vâ hlê plĕng tơdroăng cheăng  ƀă hriâm ‘na tơdroăng cheăng kal kí:

“10 hơnăm hdrối, kơxô̆ mâu ngế hriâm lối 25 rơpâu ngế, tung mê, krê mâu kuăn ngo lối 4 rơpâu 500 ngế. Kố cho tơdroăng ăm hlo tơdroăng hnê hriâm dêi hngêi trung hiăng veăng ‘no hnoăng á hnê mâu ngế vâ pro kăn ki hlê plĕng kum mâu râ Đảng dêi mâu kơ koan, tíu pêi cheăng mơjiâng khu kăn ƀô̆ dêi tơná tơƀrê tâ’’.

Tiô pôa Lê Nam Cao, Ngế xiâm phŏ hnê ngăn Đảng kong pơlê Dak Lak ăm ‘nâi, klê plĕng nhên ‘na mơjiâng, mơnhông khu kăn ƀô̆, đảng viên, mơngế pơkuâ, mơngế cheăng tung mâu kơ koan cho hdroâng kuăn ngo, mê cho tơdroăng cheăng pêi ki kal dêi tơdroăng cheăng  kăn ƀô̆, kong pơlê hiăng tơmâng Pơkâ hneăng hôp kân má 13 dêi Đảng ƀă mâu Pơkâ dêi kong pơlê, tơbleăng mâu pơkâ pêi tơdrêng rơtế ƀă tơdroăng pơkâ mâu luât pơkâ tơtro.

Tơdroăng mê hiăng pro xiâm ki rơdêi, rak tơniăn pêi pro mâu pơkâ mơjiâng khu kăn ƀô̆, mơngế pơkuâ, mơngế cheăng mâu hdroâng kuăn ngo. Pôa Lê Nam Cao tối:

“Mơjiâng mâu hnoăng cheăng pêi tung tơdroăng kal kí tung mê pêi ahdrối mâu hnoăng cheăng ki xiâm kal kăn ƀô̆ hdroâng kuăn ngo mê thế tăng mâu kăn ƀô̆ kuăn ngo. Kong pơlê xuân hiăng pêi tiô luât pơkâ rah  tăng mâu vâi o hdroâng kuăn ngo’’.

Tiô Pơkâ dêi Đảng ƀô̆ kong pơlê Dak Lak rôh má 17, hneăng hơnăm 2020-2025, tơdroăng mơnhông kăn ƀô̆, đảng viên hdroâng kuăn ngo pơtối châ tơmâng. Kong pơlê mơ-eăm troh hơnăm 2025, kơxô̆ kăn ƀô̆, mơngế pơkuâ, mơngế cheăng kơ koan cho mâu kuăn ngo tung tâi tâng kơxô̆ kăn ƀô̆ tung lâp kong pơlê châ 15% tơngi klêng.