VOV4.Xơ Đăng - Pêi pro tơdroăng pơkâ kơxô̆ 11/NQ-CP dêi Chin phuh ‘na tơdroăng ‘mâi mơnhông ƀă mơdêk cheăng kâ rêh ối pơlê pơla, Tíu pêi cheăng Hngêi rak liăn tŏng kum rêh ối pơlê pơla kong pơlê Dak Lak dế tơkŭm mơdêk rĕng tơdroăng ki ‘no liăn ăm mung, ăm kơxô̆ liăn tŏng kum kơjo mê troh ƀă mâu ngế kơtiê ƀă mâu ngế ki châ ai troăng hơlâ tŏng kum. Ing mê, veăng kum kuăn pơlê tơkâ luâ xơpá, rĕng tơniăn tung rêh ối, veăng kum rak vế gak kring tơdroăng rêh ối pơlê pơla, mơdêk ‘mâi mơnhông cheăng kâ rêh ối klêi kơ’nâi tro tơdjâk xua pơreăng COVID-19.

Khế 3 hơnăm 2022, châ mung 10 rơtuh liăn ing tơdroăng tŏng kum hok tro, sinh viên mung rôe kơmăi tĭnh ing mâu rơpŏng hngêi, ngoh Nguyễn Thuấn ối a tôh kơphô̆ 2, pơlê kân Buôn Trâp, tơring Krông Ana hiăng rôe môi toăng laptop ăm dêi kuăn kơnốu ki hriâm lâm 7. Ngoh Thuấn sôk ro xua tơdroăng mê hiăng pơtê tơdroăng ki kuăn mung phôn dêi pâ vâ hriâm online. Nôkố pơreăng hiăng rơhĭng, la laptop hiăng rôe xuân ối lĕm xua o hiăng hlê xúa app hriâm ki ê mơ’no tơdrêng tung hyôh Internet. Ngoh tối, tơdroăng kơjo kum hok tro sinh viên mung liăn rôe kơmăi tĭnh, gá tơtro ƀă mâu rơpŏng hngêi  ki ối xơpá tung cheăng kâ-rêh ối:

“Nôkố ngin mung 10 rơtuh liăn mê môi khế ngin bú tơvêh 10 rơpâu liăn rơkâ gá, hâi khế hơnăm mung châ Chin phuh pơkâ cho 36 khế, tung mê 6 khế tơvêh môi hdroh. A tơmiât hên rơpŏng hngêi ai tơdroăng rêh ối xơpá vâ châ mung liăn mê ai pơxúa khât, pơxúa ăm rơpŏng hngêi’’.

Hngêi rak liăn kum mâu kơtiê kong pơlê Dak Lak kĭ tơhrâ mung liăn tiô pơkâ 11

Xuân châ mung ƀă liăn mung tiô pơkâ 11, ngoh Nguyễn Nam Giang ối a tơring Krông Ana ăm ‘nâi: ƀă kơlo liăn pê lo dêi prế on veăng ngoh nôkố, vâ tơkŭm mơjiâng pro hngêi ối xuân thế ton hơnăm. Xua mê, klêi châ ’nâi mâu tơdroăng ‘na luât pơkâ tŏng kum ăm mung liăn tiô pơkâ 11 dêi Chin phuh ngoh hiăng pro hlá mơ-éa ăm mung 450 rơtuh  liăn, tơ’mô ƀă 50% tâi tâng kơxô̆ liăn riân ‘no pro hngêi, liăn rơkâ bú 4,8%/hơnăm.

Kơnôm châ mung liăn ƀă rơkâ iâ, rơpŏng hngêi ngoh châ mơjiâng pro hngêi nếo tơniăn tơdroăng rêh ối.

“Kơnôm kơxô̆ liăn mung mê ai liăn vâ pro hngêi, ƀă kơlo tơvêh chěn ki ai rơkâ tiah mê vâ tối xuân iâ há châ mung pro hngêi’’.

Tung rôh kố, ƀơrô mung liăn dêi hngêi rak liăn kum mâu kơtiê tơring Krông Ana châ xoăng ăm mung vâ chê 7 rơtal liăn vâ ăm mung tiô pơkâ kơxô̆ 11 dêi Chinh phuh. Riân troh nôkố tíu kố hiăng ăm mung kơjo kum tăng cheăng pêi ƀă pơtối po rơdâ tăng cheăng pêi ăm 53 ngế ƀă kơxô̆ liăn lối 2,4 rơtal liăn; ăm mung tiô tơdroăng tŏng kum kơjo kum mâu hok tro sinh viên mung rôe kơmăi tĭnh ăm 2 ngế, kơxô̆ liăn 20 rơtuh liăn; ăm mung tiô todroăng kơjo kum pro hngêi ối  kuăn pơlê  ƀă 2 ngế mung kơxô̆ liăn 770 rơtuh liăn.

Pôa Bùi Quang Tuyên, Ngế pơkuâ ƀơrô ăm mung dêi hngêi rak kum mâu kơtiê Krông Ana, kong pơlê Dak Lak tối:

“Ƀơrô pêi cheăng hiăng châ Hngêi rak liăn ăm mung vâ chê 7 rơtal liăn, tung khế 5 ƀă liăn ngân ăm xo châ 100% cho liăn châ pơcháu ăm. Mâu kơxô̆ liăn mung tiô pơkâ 11 mê vâ tối hiăng teăm ăm kuăn pơlê ki xơpá mung xua pơreăng tâ tú ai tiô púi vâ mung vâ pơtối pêi cheăng kâ tê mơdró vâ ‘mâi mơnhông cheăng kâ tung rơpŏng hngêi’’.

Kơmăi tính châ mung tiô kơxô̆ liăn ăm mung tơvêh rơkâ iâ dêi Pơkâ 11 hiăng kum ăm hên hok tro ki kơtiê châ mơnhông tung pơla hriâm Online tung pơla klâ kơtăn xua COVID - 19

Tiô kơxô̆ riân ngăn dêi Hngêi rak liăn kum mâu kơtiê kong pơlê Dak Lak, kong pơlê châ Tíu xiâm tơnêi têa xoăng lối 71 rơtal liăn vâ tơbleăng tơdroăng ăm mung tiô pơkâ 11, mê cho: ăm mung kơjo kum tăng cheăng pêi, pơtối ƀă po rơdâ tăng cheăng pêi; cho mung pro hngêi ối ăm kuăn pơlê ki kơtiê xơpá ƀă mung ăm mâu hok tro, sinh viên ki kơtiê xơpá mung vâ rôe kơmăi tĭnh, tơmeăm xúa tung hriâm tơdrêng tiô troăng hyôh Internet.

Troh nôkố, lâp tung kong pơlê hiăng ăm lối 52 rơtal liăn ăm mung kơxô̆ liăn ki mê. Nếo achê kố, Dak Lak pơtối châ Tíu xiâm pơcháu tơ’nôm vâ chê 260 rơtal liăn ăm mung tiô pơkâ mê vâ pêi tơdroăng ăm mung tiô pơkâ tơnêi têa ‘na mơnhông mơdêk cheăng kâ - rêh ối pơlê pơla kơpong hdroâng kuăn ngo ƀă kong ngo pơla hơnăm 2021-2030 ƀă ăm mung ƀă mâu tíu hnê hriâm mầm non, râ má môi pa kong ki tro tơdjâk xua COVID-19.

Pôa Nguyễn Minh Hướng, Kăn phŏ pơkuâ Hngêi rak liăn kum mâu kơtiê kong pơlê Dak Lak  ăm ‘nâi, vâ ai liăn teăm ăm troh mơngế ki mung châ xúa tung pêi cheăng. Klêi Ngế pro xiâm hnê ngăn tơnêi têa pơkâ kơxô̆ 11 ‘na tơdroăng ‘mâi mơnhông cheăng kâ klêi kơ’nâi ai pơreăng kân COVID-19, Hngêi rak liăn hiăng tí tăng 'nâi plĕng ăm Vi ƀan hnê ngăn kong pơlê ai hlá mơ-éa pơkâ vâ tơbleăng pêi tơdroăng pơkâ mê.

Hngêi rak liăn kum rêh ối pơlê pơla kong pơlê xuân tơrŭm ƀă mâu kơvâ cheăng khu a kong pơlê vâ séa ngăn mâu ngế, tơkŭm rĕng ăm liăn, teăm tơdrêng, tơbleăng ăm hlo, tơdrăng. Tơdrêng amê tíu pêi cheăng kô séa ngăn, tí tăng ngăn hlối kơ êng, hnê  mâu ngế ki mung liăn xuá liăn ki mung pêi cheăng tro tơdroăng, pơtối rak ki tơ-brê:

“Klêi kơ’nâi tối tơbleăng ‘na liăn ăm mung mê Hngêi rak liăn hiăng tí tăng ‘nâi plĕng ăm Vi ƀan kong pơlê ai hlá mơ-éa hnê mơhno dêi mâu kơ koan khu grup rơtế ƀă Hngêi rak liăn séa ngăn mâu ngế ki kal vâ mung liăn, klêi ai inâi ăm ‘nâi Hngêi rak liăn kum mâu kơtiê hnê mơhno ăm ƀơrô ăm mung dêi mâu tơring tơrŭm ƀă mâu kơvâ cheăng khu grup a tơring vâ tơbleăng tơdroăng ăm mung rěng má môi, tro mơngế ƀă tro tơdroăng’’.

Hngêi dêi ngoh Giang pro hiăng vâ klêi

Tung pơla dế trâm xơpá xua tơdjâk ing COVID-19, liăn kum ăm mung tiô pơkâ 11 cho “Khuă”  ki vâ xê nếo tơdroăng mơnhông mơdêk chăng kâ, tơbleăng mơnhên ’na mơngế pêi cheăng ƀă mâu tơdroăng rêh ối pơlê pơla ki ê, veăng mơnhông cheăng kâ-rêh ối kong pơlê Dak Lak châ mơnhông tơbrê.

Gương tơplôu ƀă tơbleăng