Tiô tơbleăng a Hneăng hôp, sap hơnăm 2021 troh nôkố, Dak Lak hiăng châ hlo, rup vâ chê 1 rơpâu roh, lối 1.400 ngế xôi ƀă xôi luât ‘na ma tŭi; rup xo lối 3 kilô heroin ƀă vâ chê 6 kilô ma tŭi ki tơvât. Lâp kong pơlê ai 445 ngế pâk chik ma tŭi, 866 ngế ôh tá păng lôi pâk chik ma tŭi ai hô sơ pơkuâ.

Hluâ 3 hơnăm, po rơdâ pêi pro tơdroăng tơkêa bro, châ tơƀrê tơdroăng pơtâng tối hbrâ mơdât ma tŭi châ mơdêk. Hên tơdroăng xiâm, troăng pêi, troăng pơtâng tối châ ai hên. A hneăng hôp tơpui tơno, mâu kăn teăng mâ tối ma tŭi rế hía rế hlo kí ‘nâng, tơdroăng pơtâng tối, mơhnhôk vâ kuăn pơlê mơdêk kơchăng, tơplâ mơdât ƀă mâu ngế xôi ‘na ma tŭi xuân thế kal châ mơdêk ƀă ai tơdroăng pơ’lêh tơtro.

Tung mê, kal hbrâ tơdroăng môi tuăn dêi mâu krâ pơlê, kăn pơkuâ pơlê, ngế ki kuăn pơlê loi tơngah ƀă mâu ƀok xối vâ pơtâng tối ăm kuăn pơlê ‘na mâu tơdroăng pêi pro dêi mơngế xôi ‘na matŭi.