Kơxê hâi lơ 9/1, Khu kăn pơkuâ hnê ngăn Đảng kong pơlê Dak Lak tơkŭm po Hôp mơgêi 5 hơnăm pêi cheăng tiô pơkâ kơxô̆ 25/2028 dêi Khu xiâm kal kí hneăng má 12 ‘na “mơdêk kring vế tơniăn troăng rơhlâ dêi Đảng, tơplâ ƀă tơdroăng ôh tá tro, kơneăm tung tơdroăng nếo nôkố”. Mơgêi tơdroăng cheăng kal kí hơnăm 2023, tơbleăng pêi tơdroăng cheăng hơnăm 2024. Tung mâu hơnăm hdrối, tơdroăng tơplâ mơdât  khu ‘mêi hriăn pro tơdroăng ôh tá tro, khu kơneăm “ki pro chiâng ôh tá tơniăn hơniâp’’ ƀă tơdroăng khu ‘mêi hriăn pro tơ’nhiê a Dak Lak hiăng châ tơƀrê mâu tơdroăng.

Tơrêm Đảng ƀô̆ hiăng mơ-eăm hên tâ kơ mê nếo, mơdêk ki tơƀrê ƀă pơxúa tung mâu tơdroăng cheăng ‘na tuăn mơno túa lĕm tro. Laga, a Dak Lak xuân ối mâu tơdroăng tơvâ tơvân, ôh tá tơniăn, malối mâu tơdroăng tơdjâk troh tơnêi, kuăn ngo, tiô khôp. Mâu khu ‘mêi, tăng rôh vâ pro tơ’nhiê tơdroăng kal kí, pơlông djâ, mơjiâng khu ki plâ ‘nhiê Đảng, Tơnêi têa.

Tối tơbleăng a hneăng hôp, pôa Phạm  Minh Tấn, Kăn phŏ hnê ngăn Đảng kong pơlê Dak Lak pơkâ thế, tung la ngiâ, rêm râ ủy , mâu kăn pơtối mơdêk tơdroăng tơplâ tơtrâ tơdroăng ôh tá tro, ki kơneăm, kring vế troăng rơhlâ dêi Đảng. Ngăn mê cho hnoăng cheăng pêi ki kal đi đo dêi tâi tâng khu cheăng kal kí ƀă tơrêm ngế kăn ƀô̆, đảng viên. Pakĭng mê, pơtối tăng ‘nâi plĕng, séa ngăn tơdroăng tơpui tối tung pơlê pơla vâ teăm tăng ‘nâi, tơleăng mơnhên tíu ki ôh tá tơniăn ing pơlê cheăm hdrối.