A Kơchơ kân Ƀuôn Ma Thuột – tíu ki tê kân má môi dêi kong pơlê Dak Lak, hiăng mơđah tơbleăng tê tơ’nôm hên túa tơmeăm, tro ƀă rôh roê kế tơmeăm mơ’nui hơnăm. Hên má môi cho mâu hmân ếo, yêp chêng khŏng, kơƀăn kĕo. Nâ Đoàn Thị Phong, ngế ki tê hmân ếo a kơpong B kơchơ kân Ƀuôn Ma Thuột ăm ‘nâi:

“Hơnăm kố á hbrâ hên mâu hmân ếo vâ tê tung rôh Têt tâk 20% tâng pơchông ƀă rêm hơnăm, á xuân tơbleăng tê mâu hmân ếo ki vâ tê kơ’nâi Têt Lo hơnăm nếo ƀă tê tung rôh Têt hlối. Tơngah tơdroăng ki roê xúa kô tâk hên tâ, roê tê hên kế tơmeăm tâ. Yă tê hơnăm kố krâ kơvâ, tơmeăm hên. Hơnăm kố, tơmeăm pêi lo ing chiâk deăng tối tơdjuôm a kong pơlê gá chía tơniăn, ngin tơngah Têt vâi roê xúa hên tâ”.

Tiô nâ Lưu Thị Hồng Hạnh, ngế ki pơkuâ tíu tê tơmeăm a kơchô C, kơchơ kân Ƀuôn Ma Thuột mâu hơnăm a chê kố, kuăn pơlê ôh ti roê tơmeăm Têt hên môi tiah mâu hơnăm hdrối mê hía nah, ngế ki roê xuân tơtrŏng ‘na ki dâi lĕm dêi mâu tơmeăm khoăng hên tâ mê mâu ngế ki tê xuân athế roê ‘mot tê tơmeăm ki dâi vâ tê ăm kuăn pơlê:

“Yă tê hơnăm kố xuân pro tơniăn, ai kơdroh môi iâ. Tối tơdjuôm cho mâu kế tơmeăm ki tê tung hơnăm kố gá hên. Tung pơla rôh ki á roê tơmeăm vâ tê ăm kuăn pơlê roê xúa tung pơla Têt, á hiăng ai mâu tơmeăm ki ai tĕm tơniăn, ai hoă đơn, chêh inâi tơmeăm tơniăn kơvâ kơƀăn kĕo, tâi tâng mâu kế kâ mê vâi krâ nhŏng o hmiân tuăn”.

Vâ tê tung rôh Têt Giáp Thìn hơnăm kố, hngêi ki tê kân má môi a kong pơlê Dak Lak xuân hiăng hbrâ rơnáu mâu kế tơmeăm, kĭ tơkêa tơhrâ ƀă mâu khu ki tê ki vâi loi tơngah vâ rak tơniăn ki dâi lĕm. Mâu Siêu thĭ a Dak Lak hiăng tơbleăng hên tơdroăng mơhnhôk ăm tơ’nôm ƀă hên tơdroăng ki kum ‘na yă roê, môi tiah: kơdroh yă tơdrêng, kơdĭng điêm, hbru phĭu roê tơmeăm, hbru ăm tơmeăm, roê 2 hbru ăm 1 ƀă hên ki ê.

Tiô pôa Bùi Văn Quân, kăn pơkuâ Siêu thĭ Go Ƀuôn Ma Thuột, troh nôkố Siêu thĭ hiăng pêi klêi hnoăng cheăng hbrâ tơmeăm Têt, ƀă kơxô̆ tơmeăm roê troh vâ chê 32 rơtal liăn.

“Siêu thĭ hbrâ ăm túa pơkâ tê kế tơmeăm Têt hdrối 2 khế. Hơnăm kố, ngin ‘măn kơdĭng tơmeăm tâk 10% tâng pơchông ƀă hơnăm hdrối, tơdroăng cheăng tung la ngiâ dêi ngin hơnăm kố kơdroh tê mâu drôu ƀiê̆r troh tơdế xua tơdroăng ki rơhêng vâ ôu dêi kuăn pơlê ƀă xua mâu troăng hơlâ pơkâ ing Chin phuh. Ngin mơdêk tơ’nôm hnôu ‘măn kế tơmeăm hngíu, ƀă pêi cheăng bă mâu khu ki tê vâ hbrâ rơnáu tơmeăm Têt”.

Tiô pôa Nguyễn Văn Nghiêm, kăn phŏ pơkuâ Khu ngăn kơmăi kơmok ƀă tê mơdró kong pơlê Dak Lak, tơdroăng ki hêng vâ roê tơmeăm tung rôh Têt Lo hơnăm nếo Giáp Thìn 2024 a kong pơlê Dak Lak tiô tối hdrối tâk dâng 15%. Kơvâ kơmăi kơmok ƀă tê mơdró hiăng hnê mơhno mâu tíu pêi cheăng tê mơdró a kong pơlê tơbleăng túa pơkâ ‘măn kơdĭng hên tơmeăm ki lĕm, yă tê tơtro ƀă pơkâ thế mâu khu mơdró kâ tê tơmeăm pro tơniăn yă, tơhrâ pôi tá ăm ai tơdroăng ki ôh tá bê tŭm tơmeăm, tê yă kơnâ.

Rơtế amê, tơbleăng mâu tơdroăng mơhnhôk, tơkŭm po mâu rôh po kơchơ, mơđah tơbleăng, po kơchơ tê tơmeăm Việt Nam a thôn pơlê. Pôa Nguyễn Văn Nghiêm, ăm ‘nâi:

“Troh nôkố ai 11 khu mơdró kâ veăng tung tơdroăng ki pro tơniăn yă mâu kế tơmeăm kal vâ roê xúa. Tâi tâng ki kơnâ vâ chê 500 rơtal liăn, tá hâi riân troh mâu khu ki tê mơdró krê, rơpŏng tê mơdró ai tíu tê tơmeăm a kong pơlê. Hơnăm kố ai tơdroăng ki tơ’lêi hlâu tâ, mê cho khu mơdró kâ hbrâ rơnáu hên mâu kế tơmeăm, hlối hên túa ƀă rak tơniăn krúa kế kâ. Tơdrêng amê ngin xuân pêi cheăng ƀă khu mơdró kâ, mâu tíu ki lâi ôh tá bê kế tơmeăm mê kô pơtroh ăm kế tơmeăm vâ tê troh a tíu ki mê hlối drêng ai tơdroăng ki vâ roê”.

Tơdroăng ki hbrâ rơnáu krâu dêi mâu khu ki tê mơdró, khu mơdró kâ ƀă kơ koan ki ai tơdjâk troh cho tơdroăng ki ăm hlo tơƀrê vâ mơhnhôk mâu ngế ki roê xúa, pro tơ’lêi hlâu má môi ăm kuăn pơlê Dak Lak tơdah Têt ai tŭm kế tơmeăm, tơniăn.