Kong pơlê Dak Lak nôkố ai dâng 150 Khu pêi cheăng tơrŭm pêi chiâk lối 270 kơdrum deăng, kân, kŭn ƀă lối 15 rơpâu rơpŏng kuăn pơlê tơrŭm pêi cheăng ƀă tê tơmeăm pê lo ăm mâu khu mơdró. Tơdroăng veăng pêi cheăng tơrŭm pro pơxúa ăm rêm pâ ki veăng pêi. Mâu khu mơdró, Khu pêi cheăng tơrŭm ai xiâm ki vâ mung tơmeăm vâ tơniăn tung tê mơdró, tơmeăm hlối lĕm, ai tíu  pê lo tê mơdró tơmeăm ăm kuăn pơlê ing mâu kĭ tơkêa tơrŭm cheăng, kum ăm kuăn pơlê ai cheăng pêi.

Tơdrêng amê, tơdroăng tơkŭm pê lo tơmeăm krúa, tơniăn, mâu xiâm tơmeăm xúa ‘nâi tíu pêi lo mơhno nhên ăm mơngế ki rôe xúa, kum kuăn pơlê ai cheăng pêi. Tơdroăng xúa kih thuât ki rơkê tung pêi chiâk deăng pê lo tơmeăm kum kơdroh ki tơdjâk ‘mêi ing pá kong.

Nếo achê kố, Vi ƀan hnê ngăn kong pơlê Dak Lak hiăng tơkŭm po hôp tối 5 hơnăm pêi pro tiô pơkâ 98 hơnăm 2018 dêi Chin phuh. A rôh hôp mâu kăn  hiăng pâ thế, tơbleăng mâu troăng rơhlâ pêi tiô mâu tơdroăng tơkêa bro, pơkâ tơrŭm ƀă tê tơmeăm kuăn pơlê ki pê lo ing chiâk deăng châ tơƀrê hên tâ nếo. Pôa Huỳnh Bài - kăn hnê ngăn Khu pêi cheăng tơrŭm kong pơlê Dak Lak pâ thế:

 “Khu tơrŭm cheăng kong pơlê púi vâ veăng tơmâng ‘na tơdroăng hnê mơngế, má péa nếo pro tơ’lêi hlâu vâ mâu khu pêi cheăng tơrŭm ai tơnêi vâ pro mâu kơpong pêt tơmeăm, mơjiâng pro mâu hnôu, plông vâ têng tơmeăm tung pêi pro. Bă rêm râ kăn xuân môi tiah khu mơdró thế tơrŭm tăng tíu tê tơmeăm pê lo dêi khu pêi cheăng tơrŭm vâ châ tơniăn”.

Pôa Huỳnh Bài xuân ăm ‘nâi, pơla hdrối kố nah Khu pêi cheăng Tơrŭm kong pơlê Dak Lak hiăng tơkŭm tơbleăng hiăng pro klêi tíu tê mơdró tơmeăm dêi mâu khu tơrŭm cheăng, khu pêi cheăng tơrŭm ƀă mâu tơmeăm pê lo châ mơnhên OCOP. Tíu tê mơdró châ pro a kơxô̆ 88 troăng Điện Biên Phủ, bêng Thành Công, pơlê kong kơdrâm Ƀuôn Ma Thuột, tơbleăng tê 131 túa tơmeăm pê lo dêi 25 Khu pêi cheăng tơrŭm tung kong pơlê.

Tíu tê mơdró tơmeăm dêi Khu tơrŭm cheăng, khu pêi cheăng tơrŭm ƀă mâu tơmeăm OCOP kô cho tíu ki tơdjêp tê mơdró tơƀrê pơla mâu Khu pêi cheăng tơrŭm ƀă mâu ki tơrŭm cheăng rôe tơmeăm pê lo dêi kuăn pơlê, ki xing xoăng tơmeăm ƀă mơngế rôe xúa.

Nếo achê kố, Vi ƀan kong pơlê Dak  Lak xuân hiăng tơkŭm po Hôp mơgêi 3 hơnăm tơbleăng pêi pơkâ mơnhông cheăng kâ pú hên, khu pêi cheăng tơrŭm pơla hơnăm 2021-2025 ƀă tơdroăng pêi pro dêi Vi ƀan kong pơlê tối mơgêi dêi Khu xiâm kal kí ‘na pơtối hơ’lêh nếo, mơnhông mơdêk ƀă pêi tơƀrê cheăng kâ pú hên tung mâu hơnăm  la ngiâ.

Tung 3 hơnăm apoăng tơbleăng pêi pơkâ mơnhông cheăng kâ rêh ối pú hên, khu pêi cheăng tơrŭm, kong pơlê Dak Lak hiăng kơjo kum mơjiâng nếo 57 khu pêi cheăng tơrŭm; tŏng kum mâu khu pêi cheăng tơrŭm kơmăi kơmok, xúa kơmăi tung pơ’lêh nếo ƀă kơmăi, mơjiâng inâi, mơjiâng khu pêi cheăng tơrŭm pêi chiâk ki xiâm dêi kong pơlê... ƀă tâi tâng kơxô̆ liăn lối 6 rơtal liăn.

Mâu luât pơkâ tŏng kum djâ mơngế pêi cheăng hơnăm ối nếo  lăm pêi cheăng a kơpong cheăng kâ pú hên; ôh tá nâp hnoăng mơhá tơnêi, tah chĕn ki pro hnoăng mơhá; tŏng kum pro tơmeăm khoăng têng uâ pơliê pro tơmeăm ăm khu pêi cheăng tơrŭm chiâk deăng... châ rêm râ, kơvâ cheăng, cheăm tơring pêi. Liăn ‘măn mơnhông Khu pêi cheăng tơrŭm kong pơlê Dak Lak hiăng châ xo ăm mâu khu pêi cheăng tơrŭm mung lối 19 rơtal liăn; liăn ‘măn kơdĭng kum cheăng pêi dế ăm 8 khu pêi cheăng tơrŭm mung lối 1 rơtal liăn.

Pôa Nguyễn Thiên Văn, Kăn phŏ hnê ngăn Vi ƀan kong pơlê Dak Lak ăm ‘nâi, ki hên khu pêi cheăng tơrŭm, tôh pêi cheăng tơrŭm a kong pơlê kŭn tê, liăn iâ, tơdroăng cheăng pêi iâ; kong pơlê tơrŭm tăng cheăng hâi rơkê. Vâ ai tiô pơkâ troh hơnăm 2030, kong pơlê ai dâng 800 khu pêi cheăng tơrŭm ƀă 1 rơpâu tôh pêi cheăng tơrŭm, pôa Nguyễn Thiên Văn ăm ‘nâi:

 “Tung mâu hơnăm la ngiâ kal mơdêk rĕng tâ nếo tơdroăng mơjiâng, ‘mâi mơnhông khu pêi cheăng tơrŭm tiô Luât Khu pêi cheăng tơrŭm hơnăm 2012 ƀă la ngiâ kố ah hâi lơ 1/7/2024 kô tơleăng pêi tiô Luât Khu pêi cheăng tơrŭm hơnăm 2023. Tung Luât Khu pêi cheăng tơrŭm hơnăm 2023 ai 8 khu luât pơkâ ƀă kơvâ cheăng ƀă kơmăi kơmok ai kơjo kum krê xêh. Kal thế Khu kăn pơkuâ hnê ngăn Đảng, mâu kăn cheăm, tơring, Kơvâ cheăng thế tơmâng kum a hdrối tơmeăm vâ kum kuăn pơlê ki pêi chiâk ing mâu rôh tơkŭm teăng mâ dêi vâi, ai tiah mê ‘no tơdroăng xúa kơmăi kơmok pơ’lêh kơxô̆, xua khoa hok kŏng ngê̆, xúa mâu pơkâ pêi, mâu tơdroăng pơkâ ki tơtro tung pêi pro tơrêm kơvâ cheăng tiah mê nếo châ pơ’lêh  tơƀrê tung kong pơlê’’.

Vâ tối, mâu hơnăm hdrối ing cheăng kâ pú hên a Dak Lak hiăng mơnhông ‘na kơxô̆ ƀă mơdêk ki tơƀrê lĕm, veăng ‘no hnoăng kân tung tơdroăng pơ’lêh pêi cheăng, mơdêk ki pơxúa tơmeăm pê lo, veăng ‘no hnoăng ki pơ’lêh ngiâ méa thôn pơlê.