Hiăng ai vâ chê 500 kế tơmeăm droh rơtăm châ pêi pro ƀă tâi tâng ki kơnâ vâ chê 7,8 rơtal liăn. Kố cho mâu tơdroăng châ tơƀrê châ tối a hneăng hôp mơgêi tơdroăng pêi Droh rơtăm pleăng hnoăng cheăng rơnó pơtê hriâm hơnăm 2023 dêi Khu pơkuâ Đoân droh rơtăm kong pơlê Dak Lak tơkŭm po mơ’nui măng tĭng hdrối.

Ƀă dó inâi Rơxông ối nếo Dak Lak djâ troăng ahdrối tung pơhlêh pêi cheăng xúa kŏng ngê̆, Tơdroăng pêi Droh rơtăm pleăng hnoăng cheăng rơnó pơtê hriâm kong pơlê Dak Lak hơnăm kố châ pêi pro ƀă lối 830 khu pleăng hnoăng cheăng, 270.400 roh đoân viên, droh rơtăm veăng.

Tung 3 khế dêi tơdroăng pêi, lâp kong pơlê hiăng pêi pro vâ chê 500 tơmeăm droh rơtăm ƀă tâi tâng kơnâ pro pơxúa cho vâ chê 7,8 rơtal liăn. Mâu kế tơmeăm tơdroăng cheăng tơkŭm tung mâu tơdroăng, môi tiah: veăng mơjiâng thôn pơlê nếo, tíu kuăn pơlê rêh ối kơdrâm rơkê; gâk kring kong prâi, hbrâ ví kong prâi hơ’lêh; tơniăn kum rêh ối pơlê pơla ƀă tŏng kum ăm vâi hdrêng. Hên tơdroăng tơkŭm tung kơpong hơngế hơngo, kơpong tơkăng kong a mâu tơring Lăk, MDrăk, Ƀuôn Đôn, Ea Súp ƀă Krông Bông.