Pơtối tơdroăng ‘mâi rơnêu troăng kơxái cáp ki kân dêi hyôh rơ’jíu internet, malối ‘mâi rơnêu mâu tíu ki nhôm ôh tá tơniăn, ah lơ pro chiâng tơdjâk ti tit  on tơhrik. Khu ngăn on tơhrik Dak Lak hiăng mơjiâng khualo “ ‘na tơmeăm kih thuât” ƀă lối 50 ngế mê cho kăn hnê ngăn on tơhrik, kăn hnê ngăn 6 tíu pê cheăng hyôh phôn, internet, mâu ngế pêi cheăng rak ngăn troăng kơxái, kŏng nhân rak ngăn troăng cáp.

Rêm hâi, khu kố pơtối tơmâng xo mâu tơdroăng nếo ai, ngăn um xup ai mơhno tíu tọa độ drêng ai tơdroăng xía vâ  ‘na troăng kơxái ki kân a trăng on tơhrik, môi tuăn pêi pro mâu tơdroăng tăng ‘nâi nhên troăng kơxái dêi tíu pêi cheăng ki lâi kơ’nâi mê kô xo tơvêh, pôa tah ‘nâ ăm chía hôi, kât krá lĕm.

Mơhé nếo mơjiâng khu Zalo la “Tơmeăm khoăng kih thuât” hiăng kum ‘mâi rơnêu mâu tơdroăng rĕng ƀĕng ƀeăn, ví tơdroăng pôe tah on tơhrik ah chiâng tơdjâk  ôh tá têi hyôh troăng internet. Tung la ngiâ PC Dak Lak kơ pơtối rak vế pêi pro khu zalo ƀă po rơdâ tơ’nôm hên ngế dêi khu xiâm ngăn hyôh rơ’jíu internet, Ƀơrô cheăng kâ mơjiâng tơmeăm khoăng mâu tơring, pơlê kong kơdrâm, pơlê kong krâm, Kŏng ti rak ngăn loăng ngiât, on trâ eăng kơphô̆..., vâ ‘mâi rơnêu tơ’lêi hlâu tâ.

Tơdroăng kố vâ mơdêk tơrŭm pơla mâu tíu pêi cheăng, tơniăn môi tuăn tung tơdroăng ‘na pro krúa kơphô̆, ‘mâi rơnêu troăng kơxái meăm hyôh măng, tróu  tơkâng loăng ngiât la ôh tá tơdjâk troh tơdroăng mung ‘no tơhrik, troăng mơ’no hyôh măng.