VOV4.Xơ Đăng - Tơdjâk troh roh ‘nhê vâ chê 100 ha kong a tơring Lăk, Khu pơkuâ ‘na pêi chiâk deăng ƀă mơnhông thôn pơlê kong pơlê Dak Lak hiăng ai mơ-éa pơkâ Kơ koan xiâm gâk ngăn kong thâ pro hô sơ pơxâu phâk, mơnhên hnoăng cheăng khu pú hên, ngế krê pro xôi. Klêi kơ’nâi roh kếo ‘nhê tâi vâ chê 400 ha kong a cheăm Ya Tờ Mốt, tơring Ea Súp, kơ koan cheăng kong pơlê Dak Lak pơtối châ tơbleăng mâu roh ki ê, a mâu cheăm: Ia R’vê, Ia Lốp (xuân ối tung tơring Ea Súp) cheăm Dak Phơi ƀă cheăm Krông Nô, tơring Lăk.

Dak Lak mơnhên hnoăng cheăng ngế krê, khu pú hên lôi ai tơdroăng ko ‘nhê kong

Tung kơxô̆ kong tro ko ‘nhê, ai 25 ha kong rak kơnhŏng têa. Pôa Nguyễn Quốc Hưng – Kăn pơkuâ Kơ koan xiâm gak ngăn kong kong pơlê Dak Lak tối ăm ‘nâi: Kố cho mâu roh ko ‘nhê kong ki râ ó, khu gâk ngăn kong dế thâ ti tăng mơngế ƀă pro hô sơ vâ pơxâu phâk. Tơdrêng amê, Kơ koan xiâm gâk ngăn kong kong pơlê xuân kô mơnhên hnoăng dêi khu pú hên, ngế krê ki ai tơdjâk lôi ai tơdroăng ko ‘nhê kong mê ôh tá châ hlo, mơdât teăm tơdrêng.

A Sa Ly tơplôu ƀă tơbleăng