Maluâ ai mâu kơxô̆ liăn nâp châ tiô pơkâ ƀă tơkâ luâ hnoăng  pơcháu, la a kong pơlê hên kơxô̆ liăn nâp kơdroh hên tâng vâ pơchông ƀă khế kố hơnăm nah, mê cho: nâp liăn xúa tơnêi, nâp hnoăng liăn mơhá sap ing kơpong mơdró kâ tơnêi têa, nâp liăn rak vế kong prâi, nâp hnoăng pêi lo liăn krê ƀă hên ki ê.

Hlo ai tơdroăng kố, pôa Bùi Văn Chuẩn – ngế pơkuâ Khu nâp hnoăng liăn mơhá kong pơlê Dak Lak ăm ‘nâi hnoăng cheăng ki kal dêi kơvâ nâp hnoăng liăn mơhá vâ pêi châ túa pơkâ dêi hơnăm 2023 cho séa ngăn liăn ki nâp, thăm mơ’no mâu tơdroăng ki xo tơvêh kơxô̆ liăn ki tá hâi nâp, tơbleăng mâu troăng hơlâ mơdât xúa mơ-éa đơn ki ôh tá tro luât tơdrêng a mê hlối tơbleăng mâu troăng hơlâ tŏng kum môi tiah bro mơdon chĕn, ôh tá nâp liăn ƀă khu mơdró kâ ‘mâi mơnhông tơdroăng tơkâ luâ xơpá.