VOV4.Xơ Đăng - Rơtế ƀă mâu hok tro tung lâp tơnêi têa, hâi lơ 7/7 ai lối 20 rơpâu ngế hok tro a Dak Lak pơxiâm mot tung hâi tơ’noăng ki apoăng dêi hneăng tơ’noăng râ má pái phôh thong hơnăm 2022. Pakĭng tơdroăng ki mơ-eăm dêi tơná mâu vâi o mê cho tơdroăng ki tơmâng ngăn dêi mâu nôu, pâ ƀă tơdroăng ki rơtế veăng dêi pơlê pơla. Tiô pơkâ dêi Khu xiâm ngăn hnê hriâm ƀă hnê mơjiâng tuăn ngoâ rơkê, 6 chôu 30 phut hok tro athế ai mâu a tíu tơ’noăng. Ƀă tơdroăng pơkâ nếo dêi hơnăm kố, hok tro kô athế ‘măn kế tơmeăm ing lâm tơ’noăng dâng 25m, klêi mê, tơkŭm a lâm tơ’noăng vâ mâu ngế ki ngăn tơ’noăng krếo inâi mot tung lâm tơ’noăng.

Mâu hok tro châ mâu ngế ki pleăng hnoăng tŏng kum ‘na têa ôu

Vâ rak tơniăn hâi chôu, klêi kơ’nâi 6 chôu, hên hĭn mâu hok tro ƀă mâu nôu pâ vâi hiăng ai mâ a tíu tơ’noăng. Vâ kum hok tro tung pơla tơ’noăng, khu ki pleăng dêi hnoăng cheăng tŏng kum tung rôh tơ’noăng a mâu tíu tơ’noăng hnê mơhno mâu hok tro mot tung lâm tơ’noăng. Ƀă tơdroăng ki tơmâng ngăn dêi mâu nôu pâ ƀă tơdroăng ki tŏng kum kơhnâ sap ing pơlê pơla, mâu hok tro a Dak Lak hmiân tuăn, khên tơnôu mot tung hneăng tơ’noăng râ má pái phôh thong hơnăm 2022.

Katarina Nga tơplôu ƀă tơbleăng