VOV4.Xơ Đăng - Vi ƀan kong pơlê Dak Lak dế mơjiâng Hô̆i đong rah xo kơxop mơ-éa hnê hriâm râ kong pơlê hơnăm hriâm 2022 – 2023. Laga, Khu pơkuâ hnê hriâm ƀă hnê mơjiâng tuăn ngôa rơkê Dak Lak mơnhên tơdroăng rah xo kơxop mơ-éa hnê hriâm dêi kong pơlê Dak Lak hơnăm 2021 – 2022 ƀă hơnăm hriâm la ngiâ hiăng pêi rak krá tơniăn, ôh tá tơdjâk pa kong ƀă tiô pơkâ. Mâu hngêi trung tối: Tơdroăng pơ’lêh nếo hnê hriâm laga bu rah 1 troh 2 khu kơxop hlá mơ-éa mê bu cho ‘’kơƀin nếo, drôu ton’’.

Dak Lak ôh tá ai tơdroăng rah kơxop mơ-éa hnê hriâm tiô troăng '’Kơƀin nếo drôu ton’’

Peăng Khu pơkuâ hnê hriâm ƀă Hnê mơjiâng tuăn ngôa rơkê kong pơlê Dak Lak tối ăm ‘nâi, tơdroăng rah xo kơxop mơ-éa hnê hriâm dêi Dak Lak tiô 3 khu pơkâ vâ pêi: Tơtro ƀă tơdroăng cheăng kâ – rêh ối pơlê pơla dêi kong pơlê; tơtro ƀă tơdroăng tơkŭm po hnê ƀă hriâm a hngêi trung phôh thong ƀă mâu pơkâ pêi ki ê. Kăn ƀô̆, thái cô veăng tung hô̆i đong rah xo kơxop mơ-éa cho mâu ngế rơkê, kuăn pơlê loi tơngah.

Tung Hô̆i đong rah kơxop mơ-éa hnê hriâm râ kong pơlê xuân tơniăn tiô kơpong, 15 tơring, pơlê kong krâm, pơlê kong kơdrâm pơrá ai thái cô teăng mâ vâ tơniăn kuăn pơlê pơkuâ dêi hnoăng cheăng, ôh tá tơdjâk pa kong, tơdâng tơ’mô.

A Sa Ly tơplôu ƀă tơbleăng