Hbrâ rơnáu pêi pro tro hnoăng cheăng séa ngăn roê tê on tơhrik, tung 9 khế hơnăm 2024, on tơhrik Dak Lak hiăng pơxâu phâk vâ chê 920 rôh ngế pro xôi ‘na on tơhrik ƀă tâi tâng kơxô̆ liăn nâp cho 1,7 rơtal liăn. Hơnăm nah, Dak Lak xuân ối hdrối tung mâu tíu cheăng tung Kŏng ti xiâm on tơhrik Peăng tơdế Tơnêi têa (EVNCPC) ‘na kơxô̆ liăn nâp xua pro xôi xúa on tơhrik ƀă lối 2,1 rơtal liăn.

Vâ hnoăng cheăng séa ngăn kố châ tơƀrê, mâu on tơhrik tung kong pơlê hiăng xúa hên troăng hơlâ tơtro ƀă ki ai khât rêm tơring, cheăm. Mâu tơring cheăm ki kân rơdâ, ai kơmăi hrik têa tôh kế tơmeăm hên môi tiah Ea Kar, Ƀuôn Hồ, Čư̆ Mgar ƀă hên tơring ki ê hmâ ai tơdroăng ki pro xôi tong on tơhrik hên tâ mâu kơpong ki ê.

Xua mê, tung rơnó kong tôu, cho rôh ki tơkŭm hrik têa tôh mâu hdrê loăng pêt, mâu on tơhrik pơrá thăm mơdêk hnoăng cheăng séa ngăn plâ hâi plâ măng, séa ngăn krá tơniăn tơdroăng ki xúa on tơhrik, xúa kong ngê̆ vâ hbrâ rơnáu châ hlo mâu tơdroăng pêi ôh tá tro ƀă hên ki ê.

Tơdrêng amê on tơhrik Dak Lak xuân ối nhăng lăm ngăn ‘na hnoăng cheăng tê mơdró ăm kuăn pơlê, tơdroăng ki vê, riân, vâ teăm châ hlo, pơxâu phâk mâu tơdroăng ki pro hrá ‘na mơ’no tê rôe on tơhrik, pro ôh tá tơniăn.