Tơdroăng tơkêa ‘Noăng ki hbrâ mơdât têa lân lu, tơnêi tơhnah tơhnâp a mâu pơlê hdroâng kuăn ngo drô troăng têa kroăng Đăk Bla a pơlê kong kơdrâm Kon Tum ai tâi tâng ki xŏn lối 4,4 km. Tơdroăng tơkêa pro kố ing khế 9 hơnăm nah ƀă tiô tối hdrối khế 9 hơnăm kố kô pro klêi, la troh nôkố bu nếo bro châ 18% túa pcơháu.

Tâi tâng kơxô̆ liăn ‘no pro lối 200 rưtal, la troh nôkố tơdroăng cheăng pro tơmeăm kố bu nếo châ lối 60 rơtal. Kố cho tơdroăng tơkêa ki kal dêi kong pơlê, mê hơnăm 2023 hiăng châ xoăng liăn ing liăn ngân Tơnêi têa; klêi mê châ ăm phêp pro ton hâi khế pro ƀă ‘no liăn troh hâi lơ 31/12/2024.

La tơdroăng tơkêa kố pá vâ châ pro klêi xua tơvâ mâu tơnêi tơníu. Rơtế ƀă tơdroăng tơkêa pro ‘Noăng hbrâ mơdât têa lân lu, tơnêi tơhnah tơhnâp a mâu pơlê mâu hdroâng kuăn ngo ối drô kĭng têa kroăng Đăk Bla, hên hĭn mâu tơmeăm kal vâ pro a kong pơlê Kon Tum mơni kô hrá klêi, xua ôh tá châ ‘no liăn pro tro tơdroăng.