Pôa Thongloun Sisoulith, Kăn xiâm pơkuâ hnê ngăn Đảng, Kăn xiâm hnê ngăn kong têa Lếo tối nhêntơdroăng ki pôa Lương Cường châ pôk pro Kăn xiâm hnê ngăn tơnêi têa mơhno tơdroăng ki loi ƀă mơnhên tối khât dêi Đảng, Tơnêi têa ƀă Kuăn pơlê Việt Nam; loi tơngah kơ pôa Lương Cường rơtế ƀă mâu kăn xiâm pơkuâ Đảng, Tơnêi têa kô pơkuâ tơnêi têa ƀă Kuăn pơlê Việt Nam nhŏng o pơtối châ tơƀrê mâu tơdroăng cheăng ki nếo, kân tâ nếo tung tơdroăng pơhlêh nếo.

Kăn xiâm pơkuâ hnê ngăn Đảng, Kăn xiâm hnê ngăn kong têa Lếo púi vâ tơrŭm krá tơniăn ƀă pôa Lương Cường, Kăn xiâm hnê ngăn tơnêi têa vâ pơtối tơbêng tơrŭm cheăng kân, tơrŭm tung tŭm têk mâu kơvâ cheăng, khôi hmâ tơniăn lĕm pơla Đảng, Tơnêi têa ƀă Kuăn pơlê péa tơnêi têa rế hía rế mơnhông tâ ƀă tơƀrê tâ, pro pơxúa ăm kuăn pơlê xuân môi tiah xua tơdroăng ki hơniâp lĕm, tơniăn ƀă tơrŭm xua mơnhông a kơpong ƀă tung lâp plâi tơnêi.