Hâi mơ’nui khế 10, vâ chê 20 ngế kăn ƀô̆ lêng Kan sát hbrâ tơpâ mơdât on chếo ƀă tŏng xo mơngế hliăng tiâ Kŏng an kong pơlê Dak Lak rơtế ƀă kăn teăng mâ mâu rơpŏng ai mâ a plông hngêi B Hoàng Anh, troăng kân Nguyễn Công Trứ, pơlê kong kơdrâm Ƀuôn Ma Thuột vâ châ hlo tơdroăng hbrâ tơpâ mơdât on chếo a râ a’ngêi dêi hngêi.

Mâu ngế ki veăng châ hnê mơhno troăng xúa kơƀin tơpâ on, ƀă klŏng têa tơpâ on, xúa kông kơxái tŏng kum mâu ngế hliăng tiâ kreăng tung roh on chếo, Hlŭm hyôh mot tung rơkong vâ tơ’mot oxy tung châ tŏng mâu ngế trâm xía vâ...Pôa Bùi Huy Phước - Kăn teăng mâ Khu pơkuâ hngêi kân hên kơbong ối Hoàng Anh tối ăm ‘nâi, rêm hơnăm khu tê mơdró pơrá tơkŭm tơbleăng, pơtâp troăng pêi hbrâ tơpâ mơdât on chếo ƀă tŏng xo mâu ngế hliăng tiâ troh mâu rơpŏng kuăn pơlê rêh ối tung mâu hngêi kân hên kơbong ối.

Pakĭng mê ối pơtâng tối, mơhnhôk rêm ngế pêi tiô kơtăng mâu pơkâ ƀă krâ tŭm mâu kơmăi kơmok hbrâ tơpâ mơdât on chếo.

“Khu pơkuâ hngêi kân hên kơbong ối ƀă khu hbrâ tơpâ mơdât on chế má môi cho pơtâng tối ƀă má péa cho pơkâ mâu rơpŏng ai hngêi xi ôh tá ai péa vâ hlŭn ing rơ-iô mê thế rĕng pro péa vâ hlŭn ing rơ-iô. Roh pơla kố nah, ki hên kuăn pơlê hiăng pro, ối mâu rơpŏng tá hâi pro mê cho ôh tá ai mâ tung pơla kố mê ngin pơtối mơhnhôk, pơkâ vâi pêi drêng vêh, vâ drêng ai tơdroăng ki ôh tá tơniăn mê pin hluăn ing rơ-iô châ tơniăn ăm dêi châ ƀă rơpŏng hngêi’’.

Ngoh Nguyễn Tuấn Anh, môi ngế kuăn pơlê rêh ối a hngêi B Hoàng Anh - Ƀuôn Ma Thuột sap ing vâ chê 10 hơnăm kố tối, tơdroăng kuăn pơlê châ hbrâ tơdroăng ki rơkê, hnê mơhno troăng hbrâ tơpâ mơdât on chếo a hngêi kân hên kơbong ối râ a’ngêi cho kal khât. Drêng ai tơdroăng ôh tá mơhúa tro on chếo, rêm ngế ôh tá xâu xúa tơdroăng ki rơkê vâ gak ngăn dêi châ tơná, tơrŭm rơtế khu cheăng hbrâ tơpâ mơdât on chếo ƀă tŏng kum rêm ngế hluăn  ing rơ-iô. Ngoh Nguyễn Tuấn Anh tối ăm ‘nâi:

“Rơpŏng á xuân thăm veăng pơtâp hbrâ tơpâ mơdât on chếo, ƀă xuân rôe kế tơmeăm hbrâ tơpâ mơdât on chếo tung rơpŏng drêng ai tơdroăng ôh tá tơniăn mê chiâng tơpâ ƀă hluăn xêh ing xâu xía. Á hlo tơdroăng hnê mơhno hbrâ tơpâ mơdât on chếo kố cho kal khât, xuân pói vâ tâi tâng mâu kuăn pơlê ki ê a hngêi kân xŏn hên kơbong ối kal ai mâ tŭm vâ khu hbrâ tơpâ mơdât on chếo ƀă tŏng xo mâu ngế hliăng tiâ vâi tơkŭm pơtâp mơdêk tơdroăng cheăng ƀă drêng ai tơdroăng ôh tá tơniăn mê rơtế tơrŭm tơpâ mơdât on chếo ƀă hluăn ing xâu xía’’.

Tiô tơbleăng dêi khu Kan sát hbrâ tơpâ mơdât on chếo ƀă tŏng kum mâu ngế hliăng tiâ Kŏng an Dak Lak, sap ing tơdế khế 12/2022 troh nôkố, a Dak Lak ai 17 roh on chếo, pro hlâ 1 ngế, tro rong chât ngế, pro tro lŭp ‘na kế tơmeăm khoăng kơxô̆ liăn lối 5,55 rơtal liăn. Kơxô̆ roh on chếo tâng pơchông ƀă roh kố hơnăm hdrối kơdroh 3 roh, laga kơlo ki râ pơtối tâk, kơxô̆ mơngế tro rong hên tâ.

Khu cheăng hiăng tơkŭm po tơbleăng luât, tơdroăng rơkê hbrâ tơpâ mơdât on chếo ƀă tŏng xo mơngế hliăng tiâ ăm rơpâu ngế; po 101 lâm hnê hbrâ tơpâ mơdât on chếo ƀă tŏng xo mơngế hliăng tiâ ăm dâng 9.300 mâu ngế ối tung kuăn pơlê hbrâ, khu tơpâ on chếo a pơlê pơla...

Trung tă Phùng Việt Đức – Kăn phŏ pơkuâ Kan sát hbrâ tơpâ mơdât on chếo ƀă tŏng xo mơngế hliăng tiâ Kŏng an kong pơlê Dak Lak mơnhên, tơdroăng rơpâu ngế châ pơtâng tối, châ hlo, hnê pơtâp hbrâ tơpâ mơdât on chếo ƀă tŏng xo mơngế hliăng tiâ kô mơdêk tơdroăng hlê plĕng ƀă ki rơkê tơdjâk troh hbrâ tơpâ mơdât on chếo, hluăn ing xâu xía xuân môi tiah ki rơkê ‘na thâ pơlât apoăng. Ing mê, kơdroh tro lŭp ‘na mơngế ƀă kế tơmeăm khoăng tung mâu roh on chếo. Trung tă Phùng Việt Đức tối ăm ‘nâi:

“Ing mâu tơdroăng hnê pơtâp hbrâ tơpâ mơdât on chếo mê kuăn pơlê ƀă mâu ngế cho hok tro, sinh viên, mơngế pêi cheăng mơdêk hlê plĕng pôu râng hnoăng dêi châ tơná tung tơdroăng hbrâ tơpâ mơdât on chếo ƀă ‘nâi mâu troăng ki xiâm ‘na tơdroăng hbrâ tơpâ mơdât on chếo ƀă ‘nâi mâu troăng pêi ki xiâm ‘na tơdroăng hbrâ tơpâ mơdât on chếo ƀă hngêi ối rơpŏng hngêi, hngêi hên ngế rêh ối, mâu hngêi kân xŏn hên kơbông ối lơ hngêi sinh viên, hok tro ối. Ing kố ‘nâi mâu troăng hbrâ tơpâ mơdât on chếo ƀă ki rơhêng vâ tối cho mâu troăng tơpâ on drêng ai tơdroăng chếo, pơtối lơ trâm tơdroăng on chếo’’.

On chếo, pơtôu cho mâu tơdroăng trâm xía ôh tá ai kơbố pói vâ, laga kô chiâng ai drêng lâi ôh tá ‘nâi. Tơdroăng chiâng rơkê, hiâm mơno krá tung hbrâ, tơleăng tơdroăng on chếo drêng ai xuân môi tiah hbrâ rơnáu troăng hluăn ing on chếo cho tơdroăng kal khât ‘nâng ƀă tâi tâng rêm ngế. Ing mê, kô chiâng kơdroh hên ‘na tro lŭp mơngế ƀă kế tơmeăm khoăng drêng ai on chếo, pơtôu.