Sap ing lối chât hâi hdrối, ngoh Nguyễn Xuân Lộc, dế tiô khôp a Tơring Khôp Ea Tul, cheăm Ea Tul, tơring Čư Mgar rơtế ƀă kuăn pơlê hiăng veăng rơnuâ hngêi khôp, pêi pro inhên rêm kế ki kal vâ pro rơnuâ, kế ki tâ, tĕm a kiâp hmốu kân ‘măn Jesu ngé a hngêi khôp tơdjuôm ăm tâi tâng kuăn khôp. Ngế krâ pul on, ngế hnhâng  troăng kơxái on tơhrik, ngế rơnêu kiâp hmố, ngế pro bo cheăng. Kơbố xuân pêi pro ƀă tuăn mơno phiu ro păng ‘nâng.

            ‘’Tung tơdroăng phiu ro Pâ Xeăng chu chiâng kuăn mơngế á xuân rơtế ƀă rêm ngế kuăn pơlê tung kuăn khôp dêi Tơring khôp Ea Tul rơnuâ pro kiâp hmốu chô ‘măn kuăn ngé vâ phiu ro Pâ Xeăng chu chiâng kuăn mơngế, vâ rêm ngế ai môi rơnó Pâ Xeăng chu chiâng kuăn mơngế tơniăn lĕm, á hlo phiu ro ‘nâng’’.

            Tung pơla kố, mơhé tơvâ tơvân ƀă rơnó krí kơphế, laga kuăn khôp a kố kơbố xuân mơdoh hâi khế vâ rơnuâ hngêi trăng, po văng hngêi trăng, tơdah Pâ Xeăng chu chiâng kuăn mơngế ƀă hơnăm nếo dế hiăng vâ chê troh. Nâ H’Ly Ktla, cheăm Ea Tul, tơring Čư̆ Mgar phiu ro tối, hơnăm kố yă kế tơmeăm pêi lo ing chiâk deăng pơrá tâk, pêi lo liăn châ hên xua mê kuăn pơlê hbrâ tơdah Pâ Xeăng chu chiâng kuăn môi ngế tung hiâm mơno phiu ro:

            ‘’Hơnăm kố hngêi á xuân hbrâ pro kiâp hmốu ‘măn Jesu ngé vâ tơdah Pâ Xeăng chu chiâng kuăn mơngế. Hơnăm kố phá tâ mâu hơnăm ki ê xua yă kơphế to kơnâ, mê cho tơdroăng phiu ro kân ‘nâng hơnăm kố, kơbố xuân phiu ro tâi tâng’’.

            Ƀok xối Hoàng Nguyên Vũ pơkuâ hngêi khôp Ea Tul tối ăm ‘nâi, hâi tĭng kân Pâ Xeăng chu chiâng kuăn mơngế hơnăm kố kuăn khôp phiu ro hên tâ péa xôh drêng hngêi khôp Pâ Xeăng châ mơ’no liăn mơjiâng ki nếo. Hbrâ ăm tĭng kân Noel hơnăm kố, sap apoăng khế 12, kuăn pơlê hiăng rơtế dêi pó veăng tơlo hâi pêi cheăng, veăng tơlo kế tơmeăm, rơtế aă ƀok pơkuâ tơring ƀă khu pơkuâ tơdroăng cheăng tung hngêi khôp Pâ Xeăng hbrâ ăm hâi tĭng kân Pâ Xeăng chu chiâng kuăn mơngế tơniăn, nhên khât, mơhno hiâm mơno ‘’Nhuô̆m Pâ Xeăng, hâk pâ tơnêi têa’’, tơrŭm hdroâng mơngế.

            ‘’Noel hơnăm kố xuân hbrâ rơnuâ hngêi khôp, Pâ Xeăng chu chiâng kuăn mơngế, tơdroăng khôp xuân rế krá tơniăn. Ƀă kuăn pơlê mê tĭng kân Pâ Xeăng chu chiâng kuăn mơngế cho tĭng kân ‘na hiâm mơno phiu ro tĭng kân dêi kuăn pơlê xuân lĕm tro. Ki rơhêng vâ tối a Ea Tul mê hngêi ki lâi xuân pro kiâp hmốu chô ‘măn Jesu Ngé vâ phiu ro Pâ Xeăng chu chiâng kuăn mơngế, hiâm mơno dêi kuăn pơlê mê cho kơdrâm kơdrĕng, hơniâp ro. Hơnăm kố châ khu râ kăn pơkuâ ăm phêp mơjiâng hngêi khôp kân, nếo, kố xuân cho tơdroăng phiu ro dêi tâi tâng kuăn pơlê, xua mê kuăn pơlê hơniâp ro ‘nâng, ing kơpeăng kŏng tơná lăm mơjiâng hngêi khôp mê ôh tá kal mung mơngế klâi ôh’’.

            Tơring Čư̆ Mgar ai 5 tơring khôp, 2 kơpong khôp ƀă 1 tíu tơkŭm po khôp, pôa Vũ Hồng Nhật, Kăn hnê ngăn Vi ƀan kuăn pơlê tơring Čư Mgar, tối ăm ‘nâi, Măng tĭng Pâ Xeăng chu chiâng kuăn mơngế hơnăm kố tơring hiăng mơjiâng 5 khu vâ troh kơ-êng, diâp kơxuô tơmeăm ƀă rơkâu mâu tíu pơkuâ tơdroăng khôp, khu ƀok xối, yah chĭng. Tơdrêng amê hnê mơhno mâu cheăm, pơlê kân kơbông krếo mâu khu tŏng kum vâ troh lăm pôu, diâp kơxuô tơmeăm ăm mâu rơpŏng kuăn pơlê ai tơdroăng rêh ối pá puât kum kuăn pơlê tơdah môi Măng tĭng kân Pâ Xeăng chu chiâng kuăn mơngế tơniăn lĕm, hơniâp ro:

            ‘’Măng tĭng kân Pâ Xeăng chu chiâng kuăn mơngế hơnăm 2023 kố, Viƀan tơring hnê mơhno mâu cheăm, bêng, pơlê kân ai hngêi khôp rak ngăn ăm kuăn pơlê tơdah Măng tĭng kân Pâ Xeăng chu chiâng kuăn mơngế tŭm, tơniăn tiô hiâm mơno cho pêi tiô mâu pơkâ luât dêi tơnêi têa ƀă ki rơhêng vâ tối cho rak ngăn ăm mâu rơpŏng kuăn khôp kơtiê, troăng hơlâ tơdah môi Măng tĭng kân Pâ Xeăng chu chiâng kuăn mơngế hơtôu, hơniâp lĕm’’.

            Pôa Dương Văn Tuệ, Kăn phŏ hnê ngăn hnê mơhno má môi Vi ƀan Rŭm môi tuăn Kuăn khôp Pâ Xeăng kong pơlê Dak Lak tối ăm ‘nâi, lâp kong pơlê ai 100 hngêi khôp ƀă lối 217 rơpâu kuăn khôp. Hơnăm 2023 tơdroăng rêh ối dêi kuăn khôp Pâ Xeăng tung kong pơlê châ pơ’lêh hên. Mâu tơdroăng tŏng kum; mâu troăng kring vế tơniăn a mâu tơring khôp, kơpong khôp; tơdroăng ‘’Tâi tâng kuăn pơlê rŭm môi tuăn mơjiâng thôn pơlê nếo ƀă rơkê hlê a tíu kơdrâm kuăn pơlê tơkŭm rêh ối’’... pơrá châ kuăn khôp Pâ Xeăng mơhnhôk môi tuăn ƀă veăng kum mơjiâng pơlê xiâm Dak Lak rế hía rế kro mơdrŏng, kân lĕm.

“Hơnăm 2023 kuăn khôp Pâ Xeăng tơ’noăng pêi cheăng pêt mơjiâng tơmeăm vâ mơnhông cheăng kâ mơdêk tơdroăng rêh ối dêi rơpŏng hngêi. Tơdroăng tơdah Măng tĭng kân Pâ Xeăng chu chiâng kuăn mơngế dế tơkŭm po kơdrâm a mâu tơring khôp, kơpong khôp ƀă kơpong kuăn pơlê rêh ối a hên tơring tung kong pơlê. Môi tơdroăng tơdah phiu ro dế troh tung kuăn khôp a pơlê kong kơdrâm xuân môi tiah kơpong hơngế hơngo’’.

            Môi Măng tĭng kân Pâ Xeăng chu chiâng kuăn pơlê pơtối troh tung tơdroăng phiu niu, sôk suâ xua dêi kuăn khôp Pâ Xeăng Dak Lak. Kơbố xuân ai tơdroăng khôp pâ ƀă pói vâ môi Măng tĭng kân Pâ Xeăng chu chiâng kuăn mơngế tơniăn, môi hơnăm nếo pêng păm tơdroăng phiu ro ƀă hơniâp lĕm./.