Tơbleăng a rôh leh, Kăn hnê ngăn Vi ƀan kuăn pơlê Tạ Anh Tuấn tối nhên hnoăng cheăng pêi ki xiâm dêi kơvâ cheăng séa ngăn tung mơjiâng khu kăn pêi cheăng tơdrăng lĕm, pêi xêt, tơƀrê. Pôa loi khât Ngế pơkuâ tíu pêi cheăng séa ngăn xiâm ki nếo rah xo kô pơtối pêi cheăng tâi ivá tuăn rơkê hiâm mơno hnoăng cheăng dêi tơná, mơdêk ki tơƀrê tung tơdroăng hbrâ mơdât kâ kơluâ, mơhrê liăn, tơleăng mơnhên sam phoăng xăm tơkêng. 

Kăn hnê ngăn kong pơlê xuân pơcháu hnoăng cheăng ăm kơvâ séa ngăn thâ séa ngăn hlá mơ-éa chêh ‘na luât, ‘mâi mơnhông tơrŭm dêi rơpó, mơdêk rế rơkê tung pêi cheăng, ai hiâm mơno lĕm tơdrăng khên tơnôu tơxâng cho kăn ƀô̆. Pôa Hồ Duy Thành hiăng troh Cử nhân Kinh Tế, Cử nhân Luật, Thạc sĩ Lý luận ƀă Lịch sử Tơnêi têa ƀă Luât, Cao cấp Lý luận chính trị.

Hdrối vâ xo pêi hnoăng cheăng ki nếo, pôa Hồ Duy Thành cho kăn pơkuâ hnê ngăn Đảng tơring, Kăn hnê ngăn Hô̆i đong kuăn pơlê tơring M’Drăk ƀă Phŏ pơkuâ cheăng dêi Vi ƀan séa ngăn hnoăng cheăng Khu pơkuâ hnê ngăn Đảng kong pơlê Dak Lak.