50 hơnăm klêi kơ’nâi tơleăng lĕm, ing môi pơlê kong krâm tơplâ, klêi kơ’nâi tơdế chal Ƀuôn Ma Thuột, kong pơlê Dak Lak xông mơ-eăm chiâng tíu pêt kơphế kân má môi dêi Việt Nam, idrâp chêng koăng châ tôu tơdah phiu ro troh veăng Leh tơbleăng kơphế.

Kố xuân chiâng môi tíu xiâm cheăng kâ, khoa hok kih thuât pêi chiâk deăng dêi Tây Nguyên. 50 hơnăm hdrối, roh tơplâ Tơleăng lĕm Ƀuôn Ma Thuột cho pơxiâm ăm rơnó Hơngui ƀlêi trâng, mê Ƀuôn Ma Thuột lĕm hâi kố cho tơdroăng châ tơƀrê 50 hơnăm hơniâp lĕm, tơniăn krê ƀă môi tuăn tơnêi têa. Ing kố, pơlê kong kơdrâm pơxiâm troăng prôk nếo, troăng prôk dêi mơnhông ƀă mot tơrŭm cheăng, chiâng tíu troh dêi kơphế lâp plâi tơnêi.

Hdrối mê, mơđah tơbleăng ngê̆ thuât Mơngiơk tơkŭm hiăng pơxiâm po a pơlê kong kơdrâm Ƀuôn Ma Thuột, rơtế tơdroăng phiu ro dêi mâu tơdroăng tung tơdroăng tơkŭm po Leh tơbleăng kơphế roh má 9 dế po a Dak Lak. Tơkŭm po sap ing kố troh tâi hâi lơ 15/3 la ngiâ, mơđah tơbleăng ‘’Mơngiơk tơkŭm’’, ‘măn kơdrum reăng pơlê kong kơdrâm Ƀuôn Ma Thuột, troăng ki xiâm troh mâu tíu tơkŭm po tơdroăng tung Leh tơbleăng kơphế; mơđah tơbleăng 150 tơmeăm ngê̆ thuât ki má môi dêi mâu ngê̆ sih xup um a 5 kong pơlê Dak Lak, Dak Nông, Gia Lai, Hải Dương ƀă Phú Yên.

Mâu um mơhno ki má môi mâu tíu ki lĕm mơnâ ngăn, ki lĕm má môi, ki rơkê ƀă khôi túa lĕm tro ki má môi dêi rêm kơpong tơnêi têa. Kố xuân cho tơdroăng ki kơnâ koh phiu ro 50 hơnăm Ƀlêi trâng Ƀuôn Ma Thuột, tơleăng lĕm kong pơlê Dak Lak; veăng gum hên tơdroăng tung Leh tơbleăng Kơphế Ƀuôn Ma Thuột roh má 9, hơnăm 2025.