VOV4.Xơ Đăng - Xua tơdjâk dêi pơreăng COVID-19, ki hên kơxô̆ vâi hdrêng mâm non a Dak Lak ôh tá chiâng troh hngêi trung hriâm tơdrêng. Ki má lối cho vâi hdrêng a pơlê kong kơdrâm Ƀuôn Ma Thuột, tâi tâng chôu hriâm tơdrêng a hngêi trung tá hâi troh 2 măng tĭng. Vâ nôu pâ hmiân tuăn ƀă pro tơ’lêi hlâu má môi ăm vâi hdrêng 5 hơnăm mot lâm 1, Khu pơkuâ hnê hriâm – Hnê mơjiâng tuăn ngôa rơkê Dak Lak dế pêi pro hên troăng tŏng kum khu vâi hdrêng a hơnăm kố.

Hơnăm hriâm 2021 – 2022, râ mâm non a pơlê kong kơdrâm Ƀuôn Ma Thuột, tâi tâng hâi khế hriâm tơdrêng a hngêi trung tá hâi troh 2 măng tĭng

Vâ pro tơ’lêi hlâu ăm vâi hdrêng 5 hơnăm mot hriâm lâm 1, pôa Phạm Đăng Khoa, Kăn pơkuâ Khu pơkuâ hnê hriâm ƀă Hnê mơjiâng tuăn ngôa rơkê kong pơlê Dak Lak tối ăm ‘nâi, Khu hiăng pơkâ mâu hngêi trung thâu video hnê mơhno nôu pâ hok tro pêi pro tơdroăng hnê hriâm, rak ngăn ƀă ki má lối tơdah mâu tơdroăng hriâm ăm vâi hdrêng 5 hơnăm. Tung mê, ƀă mâu hngêi trung ki phá tơ-ê ai kơdrâm vâi hdrêng hdroâng kuăn ngo, ai mâu muăn tơpui Xuăn tá hâi chiâng, thái cô kal tơrŭm krá tơniăn ƀă rơpŏng vâ tŏng kum, hnê mơhno hok tro thăm tơpui nâl Xuăn ahdrối mot hriâm lâm 1.

A Sa Ly tơplôu ƀă tơbleăng